Футзал бўйича ЖЧ иштирокчиларидан маълум бўлмаган фақат иккита жамоа қолди

Қувонарлиси, ушбу мусобақада Ўзбекистон футзал терма жамоаси ҳам иштирок этади. Ўтган йил футзал бўйича Осиё чемпионати ўтказилиши ҳамда бу мусобақа ЖЧга йўлланма бериши лозим эди. Бироқ коронавирус туфайли Туркманистон мусобақага мезбонлик қилишдан бош тортди. Сўнгра Қувайтга берилди ва Қувайтда ҳам вирус сабаб ўтказилмай қолди. 

Натижада ОФК мусобақани ўтказмасликка қарор қилди ва терма жамоаларнинг рейтингда тутган ўрнига қараб жаҳон чемпионатига боришини аниқлаб олишга киришди. Маълумки, ФИФА ОФК учун 5та йўлланма ажратган ва ҳозирда мундиалда иштирок этадиган Осиёнинг 3 терма жамоаси аниқ: Эрон, Япония ва Ўзбекистон. Яна иккита жамоа плей-офф баҳсларидан сўнг маълум бўлади. 

ОФК плей-офф босқичида Ироқ - Таиланд ва Вьетнам - Ливан терма жамоалари ўзаро кураш олиб боради. Ўйинлар уй-меҳмон тарзида ўтказилади. Дастлабки баҳслар 20 май, жавоб учрашувлари 25 майга белгиланган. Ушбу иккита жуфтликда ўзини кўрсатган икки жамоа ҳам жаҳон чемпионатига йўл олади. 

КОНКАКАФда саралаш баҳслари ўтказилди

Яқинда КОНКАКАФ минтақасида ЖЧга чиқиш учун саралаш баҳслари ўтказилди. Бўлиб ўтган ўйинлар натижасига кўра, Литвага борадиган яна тўрт жамоа маълум бўлди. Булар - Коста-Рика, Гуатемала, Панама ва АҚШ.   

Литвадаги жаҳон чемпионати шу йилнинг 12 сентябрь - 3 октябрь кунлари ўтказилади. Мусобақага Литванинг учта шаҳри - Вильнюс, Каунас ҳамда Клайпеда мезбонлик қилади. Футзал бўйича жаҳон чемпионатида жами 24та терма жамоа қатнашади. Жамоалар тўрттадан 6 гуруҳга бўлинади.

Футзал бўйича ЖЧ-2021 иштирокчилари: 

Япония

Эрон

Ўзбекистон

Ангола

Миср

Марокаш

Аргентина (амалдаги чемпион)

Бразилия

Парагвай

Венесуэла

Соломон ороллари

Литва (мезбон)

Қозоғистон

Португалия

Россия

Испания

Чехия

Сербия

Коста-Рика

Панама

Гуатемала

АҚШ

P.S. Яна 2та жамоа ОФК плей-офф ўйинларидан сўнг маълум бўлади.