Маълум қилинишича, блогер ЖЧ–2026 1/16 финалида Эквадорга қарши учрашув (2:0) олдидан терма жамоа қароргоҳига ташриф буюриб, барча футболчи ва мураббийларга Rolex соатларини совға қилган. Унинг айтишича, ҳар бир соатнинг қиймати 30 мингдан 90 минг долларгача, совғаларнинг умумий қиймати эса 1 миллион долларни ташкил этган.
Блогер бу совғани Мексикада яшаганини ва мамлакатга ҳурмати баланд эканини айтган. Шунингдек, у Мексиканинг Эквадор устидан қозонадиган ғалабасига 2 миллион доллар тикканини, ғалаба ҳолатида яна 1 миллион доллар ютуқ олишини ҳам маълум қилган.
Бироқ кейинчалик Мексика футбол федерацияси томонлар ўзаро келишув асосида барча совғалар қайтарилганини эълон қилди.
Бу қарор ФИФАнинг Этика кодекси талабларига мувофиқ қабул қилинган. Қоидаларга кўра, рамзий қийматга эга бўлмаган ёки манфаатлар тўқнашувига сабаб бўлиши мумкин бўлган қимматбаҳо совғаларни қабул қилиш тақиқланади. Ушбу қоидани бузганларга камида 10 минг Швейцария франки жарима ҳамда икки йилгача футбол фаолиятидан четлатиш жазоси қўлланилиши мумкин.
Эслатиб ўтамиз, Мексика терма жамоаси ЖЧ–2026 1/8 финалида Англияга қарши баҳс олиб боради.
