"Deadline" арафасида амалга ошадиган трансферлар ТОП-10

Эътиборингизга трансфер ойнаси ёпилиши арафасида амалга ошиши кутилаётган ТОП-10 тақдим этамиз.

10. Ренату Санчеш ("Бавария"дан - ?) 
Ренатунинг "Бавария"даги дебют мавсуми унчалик омадли бщлмади. Жамоага Толиссо келганидан кейин эса, янги мавсумга қаратилган умид кўзлари ҳам бефойдадек.

Ренату Санчес қаерга бўлса ҳам ижарага кетиши зарур. Ҳозир у номдор жамоанинг захирасида ўтириши эмас, мунтазам ўйин амалиётига эга бўлиши зарур.

9. Виржил Ван Дейк ("Саутгемптон"дан - "Ливерпуль"га)
"Саутгемптон" марказий ҳимоячиси Ван Дейкни сотиши лозим. "Ливерпуль" катта пул таклиф қилаётганда (маълумотларга кўра траснфер суммаси 60 миллион фунт атрофида бўлиши мумкин), рози бўлиш зарур.

Боз устига, таркибда унинг ўрнини тўлдира оладиган футболчилар мавжуд. Мисол учун Жек Стивенс ва япониялик Майя Йосида. Аммо "Саутгемптон" вакиллари ўжарлик қилиб туриб олишган.

8. Росс Баркли ("Эвертон"дан - "Тоттенхэм" ёки "Челси"га)
"Эвертон" шартнома муддати якунланиб бораётгани сабаб Барклини сотишга рози. Аммо "шпорлар"нинг иштаҳаси ёмон эмас ва уни қондиришнинг ўзи бўлмайди. Куни-кеча "Эвертон" Баркли учун 25 миллион фунт беришга тайёр "Челси"нинг таклифини рад этди. Энг қизиғи, Росс ҳозир жароҳатини даволаш билан оввора. Жамоа футболчиси учун "Челси"дан 40 миллион талаб қилишмоқда ва бу янаги йил ёзда шартномаси тугаб, эркин агентга айланадиган футболчи учун бироз кўпдек назаримизда. Футболчи учун курашга лондоннинг бошқа бир жамоаси "Тоттенхэм" ҳам қўшилган ва жамоа ярим ҳимоячи учун унча-мунча пулни аяб ўтирмаслигини билдирган.

7. Алекс Окслейд-Чемберлен ("Арсенал"дан - "Челси" ёки "Ливерпуль"га)
Чемберленнинг "Арсенал" билан шартномаси ёзда ўз якунига етади. Ҳамкорликни узайтириш таклифини эса футболчи қабул қилмади. Шу сабабдан "Арсенал" ҳозирнинг ўзидаёқ ҳужумкор ярим ҳимоячини сотиб юборишга қарши эмас. Хаттоки бу борада "Челси" билан келишиб ҳам қўйганди, аммо Чемберлен лондон клубига эмас, "Ливерпуль"га ўтишни хоҳламоқда. Қалтис қарор, кўрамиз, Алекс мерсисайдликларга қанчалик керак экан.

 
6. Анхель Ди Мария (ПСЖ дан - "Барселона"га)
Ди Мария "Барселона"ни такр этган Неймарга ўринбосар сифатида қаралаётганлар қаторида эди ва клубга Дембеле келгандан сўнг, аргентиналикка бўлган эхтиёж ўз-ўзидан йўқолиши лозим эди, аммо... "Кўк-анорранглилар" музокараларни давом эттиришди ва ПСЖ аниқ расмий таклиф ҳам олди. Бироқ француз клуби қатъий тарзда уни рад этди. Ди Мариянинг ўзи ҳам ўзгаришларга қарши эмас ва Испанияга жон деб қайтишини билдирди.

5. Тома Лемар ("Монако"дан - "Ливерпуль" ёки "Барселона"га)
"Монако"дан яна бир ёш иқтидор соҳиби. Шу ёзнинг ўзида узоқ вақтгача ушбу футболчини Арсен Венгер ўз жамоаси сафида кўриш орзусида ёнди. Лекин "канонир"лар француз клуби раҳбарияти билан ўзаро тил топиша олишмади. Сўнги кунларда Коутиньо кетиб қолсачи, деган хавотирда 21 ёшли футболчи учун курашга "Ливерпуль" ҳам қўшилди, аммо "монегасклар" яна бир етакчисини сотишни истамаяпти.

Бир неча соатлар аввал яна бир қизиқ хабар тарқалди. Қанча уринмасин, Коутиньони сотиб ололмаган "Барселона" йўналишни Лемар томон ўзгартирибди. Жудаям қизиқ ҳолат юзага келмоқда. Ким қаерга ўтаркимн, кўрамиз.

4. Диего Коста ("Челси"дан - "Атлетико"га)
Диего хатто тушларида ҳам "Атлетико"га қайтганини кўриб чиқяпти, аммо бунинг барчаси ҳозирча тушдагина содир бўляпти. Аммо "матрасчилар" ҳозирча вазиятни ҳал эта олишмаяпти.

3. Алексис Санчес ("Арсенал"дан - "Манчестер Сити"га)
"Арсенал"нинг яна бир футболчиси ҳақида узоқ вақтдан бери турли хил гаплар юрибди. Куни-кеча тарқалган хабарларга кўра, "Ман Сити" Алексис Санчесни сотиб олиш учун барча ишни қилишга тайёр эмиш. Чилилик учун "шаҳарликлар" аввалига маълум миқдордаги пул ва Рахим Стерлингни таклиф қилишаётганди, кейинроқ фақат пул билан масалани ҳал қилмоқчи бўлишди (гап 50 миллион фунт ҳақида кетмоқда), аммо бу вариантлар лондон клубини қаноатлантиролмади. Шунга қарамай, "Ман Сити" тақдирга тан бергиси келмаяпти ва трансфер ойнаси ёпилиб қолгунича аввалгиларидан ҳам яхшироқ таклиф жўнатиш ҳаракатида.

2. Филиппе Коутиньо ("Ливерпуль"дан - "Барселона"га)
Коутиньо трансфери кўпчиликнинг жонига теккани бор гап. Хатто ўша Мбаппедан ҳам кўпроқ "чайналди" бу мавзу. "Ливерпуль" сотворса ҳам керак эди, аммо бразилияликнинг қилиқлари раҳбариятнинг жахлини чиқаргани турган гап ва энди улар ҳам тескари тўнини кийиб олди. Коутиньо жароҳати сабаб "Ливерпуль"га ёрдам бера олмаётгани айтилганди, бироқ футболчи Бразилия термаси машғулотида қолганлардан қолишмай шуғулланмоқда. Энг ёмони агар бу трансфер барибир амалга ошмай қолсаю, Филиппе "қизиллар" сафида қолса, кейин у мураббий Клопп ва баъзи жамоадошлари билан муносабатини тиклай олармикин?

1. Килиан Мбаппе ("Монако"дан - ПСЖ га) 
Ёз бўйи бизни ўзи ҳақидаги хабарлар билан зериктирмаган Килиан якунда ваниҳоят ПСЖга ўтади шекил. Куни-кеча 18 ёшли форвард ПСЖ учун тиббий текширувдан ўтди ва ҳаммаси режадагидек кетмоқда. Трансфер ҳақидаги расмий хабар яқин соатлар ичида чиқиб қолиши кутилмоқда. Фейр-плей қоидалари туфайли ПСЖ Мбаппени тўлиқ сотиб ололмайди, шу сабаб келишув ижара кўринишида имзоланади ва кейинги йил ёзда 180 миллион евро тўлаб берган ПСЖ футболчини тўлиқ ўзиники қилиб олади.

Жаҳон футболи "ақлдан озмоқда". Бундан бир-икки йил аввал ҳам космик нархлар деб қаралган суммалар, бугун оддий футболчилар учун тўлаб берилмоқда. 

Сиз қандай фикрдасиз, санаб ўтилган трансферларнинг қайсилари амалга ошади? Футболчи қаерга ва нимага айнан ўша клубга ўтиши ҳақидаги фикрларингиз билан ўртоқлашинг.

Омонжон Тўхтамирзаев