«Бунёдкор» 150 миллион сўм билан мукофотланди

2013 йилги мавсум арафасида, Ўзбекистон ноҳаваскор ва ярим профессионал футбол клублари ўртасидаги мусобақалар 2013 йилги Регламентига Ўзбекистон Чемпионати ғолиби ва Кубок соҳибини пул мукофот билан тақдирлаш тўғрисидаги бандлар киритилган эди.

Шунга асосан, Регламентнинг 14.1-моддасига мувофиқ, Ўзбекистон чемпионлигини қўлга киритгани учун 100 миллион сўм, Регламентнинг 14.6-моддасига мувофиқ, Ўзбекистон Кубоги баҳсларида ғолиб чиққани учун 50 миллион сўм миқдоридаги мукофот пули «Бунёдкор» футбол клубига топширилди.

Эслатиб ўтамиз, 2013 йилнинг 25 сентябрь куни бўлиб ўтган Ўзбекистон Кубоги финалида «Бунёдкор» футболчилари Қаршининг «Насаф» жамоасини мағлубиятга учратган, 8 ноябрь куни якунига етган Олий Лига-2013 баҳсларида, сўнгги турга қадар изма-из таъқиб этиб борган «Локомотив» ва «Насаф» жамоаларини ортда қолдириб, ўз тарихида бешинчи марта Ўзбекистон чемпионлигини қўлга киритган эди.