Бу ерда ким ортиқча? "Атлетико Мадрид" кимлар билан хайрлашади?

Бўлажак трансфер ойнаси ҳақида гапимизни давом эттирган ҳолда, бугун "Атлетико Мадрид" ҳақида гаплашамиз. Хўш, ким "матрасричилар" ичида ортиқча бўлиб қолди? 

Бизни бироз бошқача трансфер ойнаси кутиб тургани аниқ. Катта эҳтимол билан бу сафар жамоалар пулга ўйинчи сотиб олиш ўрнига, футболчиларни алмаштиришга кўпроқ интилсалар керак. Энди уёғини вақт кўрсатади. 

"Атлетико" қандай ўйнашини барчамиз биламиз. Улар учун мақсадга етиш, натижага эришиш энг муҳими. "Чоло" нима қилмоқчилигини аниқ билади ва ким унинг услубига тўғри келмаса, чиқиш эшиги кўрсатилади. Ҳозир "Атлетико"да 23та футболчи бор ва яна 6 нафар ўйинчи ижарага бериб юборилган. Бу жамоа борасида гапирар эканмиз нафақат кўп ойлик олиб жамоага керак бўлмай қолганлар, балки ўзи кетишни ўйлаганлар ҳам бор. "Атлетико" етакчиларини сотишдан чарчагани аниқ. Лекин улар шуни истаса, ғазнага келадиган мўмай пулларга қаршилик қилишмайди. Бу ерда футболчиларни икки гуруҳга бўлсак тўғри бўлади чамамда: биринчиси, жамоани кучайтира олмаётгани учун кетиши керак бўлганлар, иккинчиси, янги даража, янги чақирув истаётганлар.          

"Атлетико"да ким ортиқча?

Тома Лемар (Франция)

Франциялик икки йил олдин "Атлетико"га кўчиб ўтди — ақлбовар қилмайди, лекин трансфер суммаси 70 миллион евро бўлганди. Аммо ҳеч қайси жиҳати билан жамоанинг муҳим вакилига айлана олмади. "Матрасчилар"нинг ўйин услуби Жаҳон чемпиониники билан мос келмади. Бундан ташқари, Диего Симеоне билан муносабатлари ҳам жуда яқин деб бўлмайди. Лемарнинг "Атлетико"даги статистикаси ҳам мақташга арзигулик эмас: 67 ўйинда 3та гол — баъзи ҳимоячилар ҳам бундан кўпроқ гол уради! Аслида қишдаёқ, Чоло очиқчасига Тома жамоасига керакмаслигини айтди:

"Фактлар ортиқча гапга ўрин қолдирмаяпти: Лемар билдирилган ишончни оқламади, имкониятларини тўлиқ очиб бера олмади. У бошқаларда йўқ жиҳатлари билан эътиборимни тортган ва мен доим унга ишонганман, лекин натижани сиз ҳам кўриб турибсиз. Лемар "Атлетико"да қоладими? Мен билмайман, лекин агентлар жуда яхши ишлашаётганини биламан… "

Бироқ қишда Тома Мадридда қолди ва "Атлетико" бундан жуда афсусланаётган бўлса ажаб эмас. Чунки коронавирус пандемияси сабаб трансфер нархлари кескин пасайди. Йил аввалида Лемарни 50-60 миллион еврога сотиш варианти бўлган бўлса, ҳозир "Трансфермаркт" футболчини 24 млнга баҳоламоқда. Аммо нима бўлса ҳам, Жаҳон чемпионидан қутилиш керак. 

Шиме Врсалько (Хорватия) ёки Сантьяго Ариас (Колумбия)

"Атлетико"да ҳозир бир йўла уч нафар ўнг қанот ҳимоячиси бор. Улар орасида аниқ етакчи бор — англиялик Киран Триппьер, айнан у Ла Лига ва ЕЧЛдаги ўйинларнинг асосий қисмида майдонга тушди. Киранга ҳозирда битта рақобатчи етарли, шу сабаб бу жуфтликнинг бир вакили кетиши шарт. Шиме ва Санти бир йилда таваллуд топган ва фарқ уч кун ҳолос. Хорватнинг шартномаси 2022 йилгача, колумбияликники — 2023 йилгача амал қилади. Ариасга "Интер"дан аниқ таклиф бор, ўтган йил айнан шу клуб Врсалькони ижарага олганди. 

Диего Коста (Испания)

Коста — ҳа, у "Атлетико"га жуда мос келадиган футболчи. Аммо энди уни ёши ўтиб бормоқда, жароҳатлар сони кўпайиб кетди, лекин ҳамон катта. Диего фаолиятининг энг омадли қисмидан ўтиб бўлди ва кейинги йил ёзда шартномаси якунига етади. Бўлажак трансфер ойнасида "Атлетико" ҳали қанчадир пул ишлаб қолиши мумкин. Бу мавсум Коста 19 ўйинда майдонга тушди ва 2та гол урди. Лондондан қайтгач, у "матрасчилар"га катта фойда келтирмади.

Хайрлашиш вақти келгандек. Диего ўзи шартномани охирига қадар "Атлетико"да қолмоқда. Буни тушуниш мумкин, у ҳозир қаерга кетади? Қаергадир кетса ҳам шартнома шартлари бундан ёмонроқ бўлса бўладики, яхшиланмайди. "Атлетико" ҳам вазиятни тушуниб турибди ва форвард билан тил топишиш ниятида. "Матрасчилар" ҳужум чизиғини кучайтириш учун Мауро Икарди, Эдинсон Кавани, Александр Ляказетт, Аркадиуш Милик, Альфредо Морелос ва ҳатто Сердар Азмун вариантларини ўрганиб чиқмоқда. 

Ким яхши нархга кетиши мумкин? 

"Атлетико"да ҳозир икки футболчи трансфер нархи жиҳатидан ўз "пикига" чиққан ва кўплаб топ жамоалар қизиқишига сабаб бўлмоқда. Гап Сауль Ньигес ва Томас Партей ҳақида бормоқда. Ҳар иккиси марказ футболчилари, лекин Сауль — универсаллиги билан ҳам ном чиқарган. Баъзи учрашувларда у ҳатто чап қанот ҳимоясида ҳам майдонга тушди. Қизиқ томони "Атлетико" бу икки футболчи кетса ҳам жуда катта муаммоларга дуч келмайди. Уларнинг ўрнига мексикалик Эррера ва Маркос Льорентени қўйиш мумкин. Уларнинг иккинчиси "Энфилд"да асосий таркибда туша олишини исботлаб улгурди.

Сауль Ньигес (Испания)

"Атлетико" Сауль трансферидан 75 миллион евро ишлаб олмоқчи, асосий давогар эса — "Манчестер Юнайтед". Шу ўринда Ньигес шартномасидаги товон пули 150 млн евро қилиб белгиланганини таъкидлаш лозим. Аммо трансфер бозорининг ҳозирги ҳолати ва нархларни инобатга олсак, Сауль учун бу космик суммадек.

Аввалроқ "Барселона" ҳам Сауль хизматларига қизиқиш билдирганди, лекин "Атлетико"га содиқ футболчи фаолиятини Испаниядаги бошқа клубда давом эттирмаса керак.

Томас Партей (Гана)

Партей ҳам Англияга йўл олиши мумкин. "Арсенал" футболчи билан келишувга эришишга жуда яқин келганди, лекин эндиги молиявий вазият "канонир"лар режаларини ўзгаритириб юборган бўлса ажаб эмас. Балки "матрасчилар" Партейни Ляказеттга алмаштиришни таклиф қилишар. Аммо "Арсенал" Томас учун ягона вариант эмас — Конте қўл остидаги "Интер" ҳам вазиятни синчковлик билан кузатмоқда ва имкон бўлса жим ўтирмаслиги аниқ.

Омонжон Тўхтамирзаев таржимаси