Баҳодир Аннаматов: "Нефтчи-Жарқўрғон" базасига ПФЛдан текширув келгани йўқ"

Клуб номи "Сурхон-Термиз" деб ўзгартирилиши ва ўйинлар Термиз шаҳрида ўтказилиши ҳақида эди хабар.

Бугун эрта тонгдан "Нефтчи-Жарқўрғон" жамоаси бош мураббийи Баҳодир Аннаматов таҳририятга қўнғироқ қилди:

Кеча сайтда хабарни ўқидим. Айни пайтда "Нефтчи" Қашқадарё ҳоким кубоги мусобақасида иштирок этмоқда. Жамоам чорак финалга чиқди. Лекин бу хабар тўғриси мени кайфиятимни бузди.

Уч йилдан буён Жарқўрғонда ишлаб шу жамоани охири биринчи лигага олиб чиқдик. Ўтган йил пулькада муваффақиятли иштирок этиб биринчи лига йўлланмасига эга бўлдик. 2016 йил 5 декабрдан янги мавсумга тайёргарликни бошлаб юборганмиз. Ҳозирда айтганимдек Ҳоким кубогида иштирок этаяпмиз.

Клубнинг ўз ётоқхонаси бор. ПФЛдан ҳеч ким ҳозиргача бизни текширишга келгани йўқ.

Шахсан мен Сурхондарё вилояти ҳокими Эркинжон Турдимовни қаттиқ ҳурмат қиламан. Шундай инсон вилоят ҳокими эканидан фахрланаман. Қашқадарё вилоят ҳокими кубоги тугаганидан кейин агар қабул қилсалар у кишининг қабулида бўламан. Жарқўрғонда ҳам футбол бўлишини чин қалбимдан истайман", - дейди Баҳодир Аннаматов.