"Андижон"га Мексика терма жамоаси аъзоси келиб қўшилади. У "Эвертон"да ўйнаган

Тез орада жамоага мексикалик футболчи Марко Буэно келади. 

Буэно Мексиканинг "Пачука" жамоаси тарбияланувчиси ҳисобланади. 2011 йилда футболчи ижара асосида "Леон" жамоасига ўтади. 

2011 йилнинг ёзида Марко "Пачука" жамоасига қайтади ва 9-октябрь санасида "Хагураэс" жамоасига қарши Мексика чемпионатида дебют учрашувини ўтказади. 2012 йилнинг 15 январь санасида "Пуэбла" жамоасига қарши учрашувда Буэно ўзининг илк голини киритади ва ушбу ўйинда дубль қайд этади. Ушбу йилда Пабло Буэнога Англиянинг "Манчестер Юнайтед" жамоаси қизиқиб қолади. 

2014 йилнинг бошларида ўйин амалиёти бўлиши учун ижара асосида Буэно "Эстудиантес" жамоасига ўтади. Футболчи ушбу жамоада 20 ўйинда майдонга тушиб, 5та гол уришга эришади. Шундан сўнг футболчи "Толука" жамоасига ижарага берилади. 

2016 йилда футболчи собиқ жамоаси "Леон"га қайтади. Шундан сўнг Марко Буэно 3 йил мобайнида "Гвадаларха", "Монтеррей", ва Чилининг "Эвертон" жамоаларида ижара асосида тўп сурган. Футболчининг сўнгги жамоаси Финляндиянинг ХИК жамоаси ҳисобланади. 

Марко Буэно Мексика терма жамоасининг турли ёшдаги терма жамоаларида тўп тепган. 2011 йилда Марко Буэно Мексика U17 терма жамоаси билан биргаликда жаҳон чемпионига айланган. 

2015 йилда Марко Буэно Мексика терма жамоасида АҚШга қарши ўртоқлик учрашувида дебют учрашувини ўтказади. Ушбу йилда Мексика олимпия терма жамоаси билан Канадада бўлиб ўтган Панамерика кубогида кумуш медалларини қўлга киритган. 

2016 йилдаги Риода бўлиб ўтган Олимпиада ўйинларида Мексика терма жамоаси билан иштирок этган.