Марказий учрашувда ғолиб чиққан мураббий, "1+1" қайд этган футболчи, Ўзбекистон МТЖ посбони, стандартни моҳирона ижро этган хавбек — Суперлигада 11-турнинг энг яхшилари / CHAMPIONAT.asia

Championat.asia сайти талқинига кўра 11-турнинг энг яхши дарвозабони – Абдувоҳид Неъматов ("Насаф")

"Насаф" тур марказий тўқнашувида ўз уйида ОКМКни меҳмон қилди. Учрашувда қаршиликлар 2:1 ҳисобида устун келди. Бу ғалабада посбон Абдувоҳид Неъматовнинг ҳиссаси катта бўлди. 24 ёшли дарвозабон баҳс мобайнида 4 та сэйв намойиш этди ҳамда жамоасини бир қатор голлардан асраб қолди, у ўйиннинг сўнгги сонияларида ҳам жамоаси жонига ора кирди. Шу орқали у Championat.asia ижодкорлари томонидан 11-турнинг энг яхши дарвозабони дея эътироф этилди.

Championat.asia сайти талқинига кўра 11-турнинг энг яхши мураббийи – Рўзиқул Бердиев ("Насаф")

"Насаф" тур марказий ўйинида ОКМКни 2:1 ҳисобида мағлуб этди. Бердиев шогирдлари ишончли ва мазмунли ўйин намойиш этиб, ҳақли ғалабага эришди. Унинг тактик ишланмалари ўз самарасини берди ҳамда Миржалол Қосимов жамоасидан жадвалдаги етакчилик тортиб олинди. Шу тариқа Рўзиқул Бердиев 11-турнинг энг яхши мураббийи деб топилди.

Championat.asia сайти талқинига кўра 11-турнинг энг яхши футболчиси – Дониёр Абдуманнопов ("Андижон")

"Андижон" ортда қолган тур "Бобур Арена"да "Сурхон" билан тўқнаш келиб, 2:1 ҳисобида зафар қучди. Дониёр Абдуманнопов мазкур баҳсда Бектемир Абдуманноновнинг голига ассистентлик қилган бўлса, ўзи ҳам ғалаба келтирувчи тўпни киритди. 24 ёшли вингер голни Потапов қўриқлаётган дарвозага шунчаки михлаб қўйди ва андижонликларнинг ғалабасини таъминлади. Шу тариқа Абдуманнопов 11-турнинг энг яхши футболчиси дея эътироф этилди.

Championat.asia сайти талқинига кўра 11-турнинг энг чиройли голи муаллифи – Жамшид Искандеров ("Нефтчи")

"Нефтчи" бу тур Фарғонада бир киши кам бўлиб қолган "Шўртан" устидан йирик ғалабага эришди (4:0). Фарғоналиклар тажрибали футболчиси Жамшид Искандеров 65-дақиқада стандартни аниқ ва моҳирона ижро этди. Искандеров олис масофадан жарима зарбаси орқали тепган тўп дарвоза устунини қақшатиб, тўрдан жой олди. Шундай қилиб, Ўзбекистон МТЖ хавбеки Championat.asia сайти талқинида турнинг энг чиройли гол муаллифи дея қайд этилди.