Илҳом Қурбонов: “Машъал” ҳозирча франциялик легионерга қизиқаётгани йўқ”

Хусусан Муборакнинг “Машъал” жамоаси жорий мавсум маҳаллий футболчилар билан бир қаторда хорижлик легионерлар хизматидан ҳам фойдаланишни мақсад қилган. “Газчилар” сафига франциялик футболчининг келиб қўшилиши тўғрисида хабарлар пайдо бўлди. Шунга ойдинлик киритиш мақсадида клуб бош директори Илҳом Қурбонов билан боғланганимизда қуйидагиларни маълум қилди.  

- Жамоамиз ҳар йилгига нисбатан жорий мавсумга астойдил тайёргарлик кўрмоқда. Таркибни янада кучайтириш мақсадида бир нечта футболчиларни ўз сафимизга қўшиб олдик. Шунингдек бу йил легионерлар лимитидан ҳам фойдаланишга харакат қиляпмиз. Селекция ишлари бўйича жамоамизда мен билан бирга Дилявер Ваниев шуғулланади. 

“Машъал”га келиши мумкин бўлган ўйинчилар ҳақида маълумот йиғиб бориб, улар билан музокара ўтказган холда, якуний қарорни бош мураббийга қолдирамиз. Агарда ушбу футболчилар Александр Хомяковга маъқул келса, шартнома имзоланади. Легионерлар бўйича сизга шуни айтишим мумкинки, сербиялик Милан Спремо, украиналик Дмитрий Башлай ва Олег Баранник, македониялик Жалил Асани ҳамда черногориялик Горан Вуйович каби ўйинчилар ҳозирда жамоамиз лагерида бўлиб турибди. Уларнинг айримлари билан келишувга эришдик. Шунингдек кўрикка таклиф этилганлари ҳам бор албатта.  

- Аммо франциялик футболчининг жамомизга келиши ҳақида бизда ҳеч қандай маълумот йўқ ва ҳозирча ушбу давлатдан легионер олмоқчи эмасмиз –дейди Илҳом Абдуғаниевич.  

Исломбек Рустамбеков.