"Vodiy futboli": Bugun "Navbahor" va "Andijon" o'ynaydi

“Andijon”: Bugun kuchli raqib sinovi

Bugun oliy ligada 8-turning yana beshta uchrashuvi bo'lib o'tadi. “Andijon” jamoasi ayni paytda “Lokomotiv”ga qarshi tayyorgarlikning so'nggi soatlarini o'tkazmoqda.

Ikki kun mobaynida jamoamiz Toshkentda mashg'ulotlar o'tkazdi. Bugun o'ynashga tayyor bo'lgan futbolchilarning barchasi sog'lom va hech qanday muammo yo'q. Albatta, “Lokomotiv” mamlakatimizning etakchi jamoalaridan hisoblanadi. SHu bois bugun andijonliklar kuchli raqib sinovidan o'tishadi.

Kecha “Lokomotiv” va “Andijon” yoshlari jamoalari o'rtasidagi bellashuvda mezbonlar 1:0 hisobida g'alaba qozonishdi.


"Navbahor": Qarshiliklarga qarshi o'ynaymiz

Namanganning "Navbahor" klubi bugun o'z maydonida Qarshining "Nasaf" klubini qabul qiladi. Soat 18:00da boshlanadigan o'yinga barcha muxlislarni chorlab qolamiz.

Ayni paytda musobaqa jadvalida ikkinchi o'rinda borayotgan "Nasaf"ga qarshi o'yin qiyin o'tishi shubhasiz. Bu mavsumda "lochinlar" 2ta o'yinda g'alaba qozonishgan, 1ta uchrashuv durang bilan tugagan av 4 marta mag'lub bo'lishdi.

Kecha bu jamoalarning yoshlari o'rtasidagi bahs bo'lib o'tdi. Unda "Nasaf" yoshlari 1:0 hisobida zafar quchishdi.


"Neftchi": Javohir Rasulov oliy ligadagi birinchi golini urdi   

Kecha Samarqandning "Dinamo" klubini qabul qilgan Farg'onaning "Neftchi" klubi 3:1 hisobida zafar quchdi.

O'yinning 44-daqiqasida mezbonlar yarim himoyachisi Javohir Rasulov "Dinamo" darvozasiga gol urdi. SHu tariqa, Rasulov oliy ligada o'zining dastlabki golini urishga muvaffaq bo'ldi.

2012 yilda oliy ligada debyut qilgan futbolchi bunga qadar raqib darvozasiga yo'l topa olmayotgandi. Kechagi bahs Javohir uchun alohida ahamiyat kasb etdi.

Uchrashuvda "Neftchi"dan Rasulovdan tashqari Abbos Maxstaliev va Aybek Nurboev gol urishdi.


"Qo'qon-1912": Mavsumdagi ikkinchi chetlatish

Kecha oliy liganing 8-turidan o'rin olgan "Qizilqum" - "Qo'qon-1912" uchrashuvida mezbonlar 3:1 hisobida g'alaba qozonishdi.

O'yindagi hisobni qo'qonliklar hujumchisi Nosir Otaqo'ziev ochgandi. Biroq 17-daqiqadayoq Jalil Kimsanovning chetlatilishi natijasida "Qo'qon-1912" 10 kishi bo'lib qoldi. Mezbonlar ikkinchi bo'limda sondagi ustunlikni sifat ustunligiga aylantira olishdi.

Bu mavsumda "Qo'qon-1912" jamoasining ikkinchi futbolchisiga qizil kartochka ko'rsatildi. 3-turda Qarshida mehmon bo'lgan jamoa safida Quvondiq Ro'ziev chetlatilgandi. Hozircha eng ko'p qizil kartochkani "Bunyodkor" futbolchilari olishdi - 3ta. "Qo'qon" bu borada ikkinchi o'rinda.