Ulug'bek Baqoev: "Nagaev terma jamoaga loyiq futbolchi"

Matbuot anjumanida dastlab "Buxoro" bosh murabbiyi Ulug'bek Baqoev ishtirok etib o'z fikrlarini bildirdi. 

- O'yin to'g'risini aytsam, qiyin kechdi va buni o'yindan oldin futbolchilarga ham aytgandim. Biz raqibni o'rganib chiqqandik. "Obod" jadvalda oxirgi o'rinda turgani bilan har bir ochko uchun kurashmoqda. G'alaba uchun yigitlarga va shuncha yo'l bosib Buxorodan kelgan muxlislarga o'z minnatdorchiligimni bildiraman, - deydi Ulug'bek Baqoev. 

- Ikkinchi davraning "Buxoro" uchun boshlanishini qanday baholaysiz? 
- Ijobiy. Hozircha uchta o'yinda etti ochkoni qo'lga kiritdik va bu biz uchun yaxshi ko'rsatkich.  

- "Buxoro" bu yil kuchli uchlikka kira oladimi? 
- Hozircha bu haqda o'ylayotganimiz yo'q. Lekin har bir bahsda faqat g'alaba uchun kurashyapmiz. Mavsum oxirida ko'ramiz, nechanchi o'rinda bo'lishimizni. Hozirda har bir raqibni hurmat qilgan holda maydonga chiqyapmiz. 

- Jamoangizning safardagi o'yini uydagidan farq qiladimi? 
- Uyda bizni ko'plab tomoshabinlar qo'llab turishadi. Muxlislar Buxoroda haqiqiy 12-o'yinchi vazifasini bajarib berishadi. Safardagi o'yinlarda esa mahorat evaziga to'p tepamiz. 

- Bugun ikkinchi golni o'tkazib yuborgach uchinchisini o'tkazmasak bo'lgani degan xavotir bo'ldimi? 
- Bunday xavotir doim bo'ladi. SHu bois yigitlarga doim oxirigacha kurash kerakligini uqtiramiz. 

- O'zingiz ham futbolchi bo'lgansiz. Futbolchilarni raqibni mensimaslikka o'rgatishning iloji bormi? 
- Albatta, ko'pchilik raqibga qarab o'ynaydi. Bugungi o'yinda bizda ham 20 daqiqacha shunday holat bo'ldi. Bilmadim bu nima bilan bog'liq. 

- Ko'plab muxlislar Ivan Nagaev nima uchun terma jamoaga chaqirilmayapti degan savolni berishadi. Bu borada siz nima deya olasiz? 
- Mening terma jamoa murabbiylari ishiga aralashishim yaxshi emas. Lekin xolis fikrimni bildiradigan bo'lsam, Nagaev ham terma jamoaga loyiq futbolchi. Har holda imkoniyat berilsa o'zini ko'rsata oladi. 

- Sizningcha, hozirgi kunda O'zbekistonning eng kuchli hujumchisi kim? 
- Yaxshi hujumchilar bor, lekin bir tekis o'ynash oson emas. Hammaning futbolda o'z davri bo'ladi. Ammo kimnidir alohida mana shu zo'r hujumchi deb ajratib ko'rsata olmayman. 

X.Xoliqov.