Ubaydullo Nabiev: Dinamo oliy liga sari yana bir muhim qadamni tashladi

Kutganimizdek o'yin ancha og'ir bo'ldi. Raqib jamoa tarkibi yosh bo'lishiga qaramay, jiddiy qarshilik ko'rsatishdi - deya gap boshladi Dinamo futbolchisi.

- Paxtakor-2 o'tgan turda Zomin ustidan 6:2 hisobida zafar quchganligi bu jamoaning kuchini bildirib turardi. Oldingi mavsumlarda ham aynan Paxtakor-2 favorit jamoalarni mag'lub eta olgan. Bugun birinchi bo'lim hisob ochilmadi, tanaffusdan keyin murabbiylarimiz bizga xato va kamchiliklarimizni aytishdi. Ikkinchi bo'limdan o'z o'yinimizni ko'rsatib, raqibni engishga erishdik. Asosiysi, Dinamo Oliy Liga sari yana bir muhim qadamni tashladi.

- Ubaydullo, oldingi yillarda sizni maydonda hujumchi yoki yarimhimoyachi sifatida ko'rardik. Hozirda esa himoyachi sifatida to'p surayapsiz. O'zingizga qaysi chiziqda to'p surish nisbatan yaxshi?

- CHindan ham dastlab hujumchi va yarimhimoyachi sifatida to'p surardim. Murabbiyimiz Uchqun aka Qobilov meni himoyachi sifatida kashf etgan. Oldinroq o'ng qanot himoyachisi sifatida to'p surardim. Hozirda esa markaziy himoyachiman. Aynan mana shu chiziqda to'p surish o'zimga ham yoqayapti.

- Navbatdagi turda Dinamo Orolga qarshi to'p suradi. Nukus klubi so'nggi ikkita o'yinda 7 tadan gol urib, g'alabaga erishmoqda…

- CHindan ham bu jamoaga qarshi o'yin ham oson bo'lmaydi. Birinchi davrada ham Dinamo safarda Orolni qiyinchilik bilan mag'lub etgan. Bilasizmi, Orol ko'proq uy jamoasi sanaladi. Suniy qoplamali maydonda ularga qarshi to'p surish har qanday jamoaga qiyinchilik tug'diradi. O'ylaymanki, ularga qarshi yaxshi tayyorgarlik ko'rib, Samarqandda muxlislarimizni xursand qilamiz. CHunki hozirda xato qilishga xaqimiz yo'q.