Rashid G'ofurov: "Yigitlarni taniy olmadim. Hakamlik haqida gapirishni istamayman ham"

O'yin haqida

- Albatta, "Aral" jamoasini g'alaba bilan tabriklayman. Bugun yigitlarni taniy olmadim. Uzoq yo'l, charchoq kabi xolatlar bahona bo'lmasligi kerak. Agar "Qo'qon-1912" bilan o'rtoqlik uchrashuvidagi kabi harakat qilganimizda ham bugun g'alaba qozona olardik deb o'ylayman. Bu erga kelib yutib ketgan jamoalar ham bor. "Aral" ishtiyoq borasida ustundek ko'rindi va haqli g'alabaga erishdi.

- Hakamlik haqida nimalarni ayta olasiz?

- Hakamlik haqida gapirish mening vakolatimga kirmaydi. Ularning ishini nazorat qiladiganlar bor, o'zlari baho berishsin. Har kimning o'z vijdoniga havola, hakamlik haqida gapirishni istamayman ham.

- Jamoalar o'rtasidagi o'yinlarda durang natijalar qayd etilayotgandi. Bugungi hisob kutilmagan bo'ldimi?

- Ha, bugungacha "Aral" bilan o'yinlarda durang natijalar qayd etilayotgan edi. Bu jamoa bilan ikki mavsumdan buyon to'qnash kelayotgandik. Bugun bizda yosh yigitlarning hisobiga yutib ketamiz deb o'ylagandim, yakun bunday bo'lmadi.

- Davralar oralig'idagi transferlardan ko'nglingiz to'ldimi?

- Bizda Pro-liga chempioni bo'lib Superligaga chiqish vazifasi yo'q. Jamoa tarkibida ko'zga ko'ringan futbolchilarni katta klublarga etkazib beramiz. Albatta, "Navbahor"ning o'zidan ortsa. Hozir tarkibni asosan o'zimizdan, mahalliy futbolchilardan shakllantirganmiz.