O'zbekiston Kubogi oldidan Bahrom Hakimov qanday fikrda?

 Mamlakatimizning eng kuchli to'rtta klubi final yo'llanmasini qo'lga kiritish uchun astoydil kurashadi. Xo'sh, bu borada ko'proq kimning imkoniyati yuqori? Bo'lajak o'yinlar oldidan taniqli mutaxassis Bahrom Hakimovning fikrlarini bilishga urindik.

“Nasaf” – “Bunyodkor”

Ochig'ini aytganda, bugun “Bunyodkor”ga safarda oson bo'lmaydi. CHunki “Nasaf” ham final yo'llanmasini qo'lga kiritish maqsadida bor kuchini sarflashi aniq.  Bu jamoalarning Toshkentda kechgan dastlabki uchrashuvida “qaldirg'ochlar” bir qator vaziyatlardan unumli foydalana bilmagandi. Bu narsa ularga bugungi o'yinda qimmatga tushishi mumkin. Uchrashuv kech soat 20:00da boshlanishi esa futbolchilarga engillik tug'dirishi turgan gap. Bugungi o'yinda agarda birinchi bo'lib mehmonlar hisobni ochsa, g'alabani ilib ketishi mumkin. Lekin “Nasaf” birinchi bo'lib to'p kiritsa, keyin ularni to'xtatib qolish mushkul kechadi. Bundan tashqari Qarshida muxlislarning daldasi ham mezbonlarga qo'l kelishi aniq. SHaxsiy fikrimni aytadigan bo'lsam, imkoniyatlar 60x40.

“Paxtakor” – “Lokomotiv”

Toshkentda kechadigan bu o'yinda qaysidir jamoani favorit sifatida ko'rsatish qiyin. Sababi bu klublarning har birida finalga yo'l olish uchun imkoniyat bir xil. To'g'ri birinchi uchrashuvda “Lokomotiv” kichik hisobda g'alaba qozongan. Lekin bu ularning imkoniyatini oshirgani yo'q. Kubok uchrashuvlarida har qanday natija yuz berishi mumkin. Umid qilamizki bugun qiziqarli va tomoshabop o'yin bo'ladi. Imkoniyatlarni 50x50 baholayman.

Qolganini o'yindan so'ng bilib olamiz.


Islombek Rustambekov suhbatlashdi.