Championat.asia'da yangi rukn — "OF" anonsi 

Ashkan Dejaga Eron Islom Respublikasining poytaxti Tehron shahrida tug'ilgan (5 iyul, 1986 yil). Bo'lajak futbolchi 1 yoshga to'lganida uning oilasi Berlinga ko'chib o'tadi. 16 yoshida Germaniya fuqaroligini olgan Ashkan mos ravishda nemislarning bosh jamoasida o'ynash huquqini ham qo'lga kiritdi.

Bo'yi — 181 sm, og'irligi — 74 kg. Eron va GFR fuqaroligiga ega. Poziciyasi bo'yicha vinger hisoblanadi. Ayni paytdagi transfer qiymati 400 ming evroga teng (Transfermarkt).

Klubdagi faoliyati

U futboldagi ilk qadamlarini "Raynikendorf" klubida qo'ydi, keyin "Tennis-Borussiya" bolalar jamoasida bir yil o'ynab, 14 yoshida (2000 yil) Berlinning "Gerta" klubi akademiyasiga qabul qilinadi. 4 yil davomida yoshlar jamoasi safida o'ynagan Dejaga 2004 yildan boshlab asosiy jamoa bilan shug'ullana boshlaydi. Uning Bundesligadagi debyuti shu yilning o'zida "Boxum"ga qarshi o'yinga to'g'ri keldi. SHu tariqa Ashkan 1892 yilda tashkil topgan "Gerta" klubi tarixida maydonga tushgan eng yosh futbolchiga aylandi. 2005-2006 yilgi futbol mavsumida "Gerta II" bilan mintaqaviy futbol ligasida ishtirok etgan yarim himoyachi 12 ta gol urib, musobaqaning eng yaxshi to'purariga aylandi. Mazkur natija uning keyingi faoliyatiga ijobiy tasir ko'rsatmay qolmadi. Uning harakatlari bir qator katta klublarning mutasaddilari etiborini o'ziga qaratgandi.

Dejaga 2007 yilda "Volfsburg" safiga qo'shildi. U erda yangi bosh murabbiy Feliks Magat 21 yoshli futbolchini muntazam ravishda maydonga tushira boshladi. Yarim himoyachi o'zining birinchi mavsumida 8 ta gol urib jamoa safidagi eng yaxshi futbolchilardan biri bo'ldi. "Bo'rilar" Germaniya chempionatida 5-pog'onani egallashdi, bu klub tarixidagi eng yaxshi natija edi. Keyingi yil Ashkanning samaradorligi keskin pasaydi, ammo "Volfsburg" Edin Jeko, Grafite va Zvezdan Misimovichlarning say-harakatari bilan Bundesliga chempioniga aylandi. Bu g'alaba hozirga qadar Dejaga faoliyatidagi eng katta titul bo'lib qolmoqda. 

Ashkan Dejaga "Volfsburg"dan keyin "Fulxem"da (2012/14) o'ynadi. 2013/14 yilgi mavsum yakunida London klubi CHempionshipga ravona bo'lgach, futbolchi Qatarga yo'l oldi (6,5 mln evro evaziga). "Al-Arabi" safida 2016 yilga qadar to'p tepdi va malum muddat "Volfsburg"ga qaytdi. Keyin "Nottingem Forest"dagi muvaffaqiyatsizlik. Nihoyat, 2018 yilda erkin agent sifatida "Traktor Sozi" klubi safiga qo'shildi. Dejaga bugunga qadar Tabriz jamoasi sharafini himoya qilib kelmoqda.

Terma jamoadagi faoliyati

Ashkan Dejaga bolaligida Eron o'smirlar terma jamoasidan bir necha bor chaqiruv olgan, ammo bu takliflarga jiddiy qaramagan. 2004 yilda esa Germaniya U16 jamoasidan kelgan taklifni uzoq o'ylab o'tirmadi. SHundan keyin futbolchi nemislarning 16, 17, 18, 19, 20, 21 yoshgacha bo'lgan terma jamoalarida to'p tepdi. Germaniya o'smirlar terma jamoasi safida 10-raqam aynan uniki edi. 21 yoshida Germaniya uchun maydonga tushgan futbolchi Eron terma jamoasida o'ynash huquqidan mosuvo bo'lgandi. Biroq, 2009 yil u uchun omadli bo'ldi. Dastlab, Bundesliga chempioni bo'ldi. Iyun oyida SHveciyada o'tkazilgan 23 yoshgacha bo'lgan futbolchilar orasidagi Evropa chempionatining g'olibiga aylandi. SHu yilning iyul oyida esa FIFA qoidalariga o'zgartirishlar kiritilib, Ashkan yana Eron tarkibida o'ynash huquqiga ega bo'ldi.

Keyingi yillar davomida Bundestimdan taklif olmagan futbolchi 2012 yilning 29 fevralida Karlush Keyrush boshchiligidagi Eron terma jamoasida debyut qildi. O'sha kuni forslar Qatarni qabul qilib, durangga imzo chekishgan edi (2:2). Gollarning har ikkisiga "Volfsburg" vingeri mualliflik qildi.

Malumot uchun, Ashkan Dejaga bugunga qadar Eron milliy jamoasi safida 57 o'yinda maydonga tushdi va 11 ta gol urdi. Quyida uning faoliyatiga bag'ishlangan videolavhani tomosha qilishingiz mumkin.