OCHL. “Bunyodkor” Doxadagi qahramonlikni Ar Riyodda ko'rsata oladimi?

Yaxshi bilasiz, Toshkentda o'tkazilgan birinchi o'yinda “Al Hilol” 1:0 hisobida g'alaba qozonib ketgandi. Endi “Bunyodkor”ning bor umidi javob uchrashuvidan.

Kecha kechki payt o'yinoldi matbuot anjumani o'tkazildi va unda ishtirok etgan “Bunyodkor” murabbiyi Aleksandr Volkov jamoa bugungi o'yinga tayyorligini va g'alaba qozonish uchun reja ishlab chiqqanini malum qildi. Qanday reja ekanligini esa o'yin paytida bilib olamiz. Umuman olganda, uchrashuvga bo'lgan qiziqish katta. “Bunyodkor”ning kuzgi bahslarda o'ynash-o'ynamasligi bugun malum bo'ladi.

Dastlabki bellashuvda ko'rdikki, “Al Hilol” ancha jiddiy raqib. Ammo ularni mag'lub etsa bo'ladi. Mana guruh o'yinlarida “Al Jaish”ni kuchli degandik, lekin “Bunyodkor” ularni guruhda qoldirib ketdi. Lekin farqi shundaki, “Al Hilol”da OCHLda o'ynash borasida tajriba katta. Ular musobaqaning muntazam ishtirokchisi hisoblanadi, “Al Jaish” esa birinchi bor qatnashdi va tajribasizligi pand berdi.

Bugungi o'yinga 50 ming muxlisning tashrif buyurishi kutilyapti. Malumki, “Al Hilol” uy uchrashuvlarida “Qirol Fahd” stadioni doim to'ladi. U erdagi muhit ham boshqacha bo'ladi. Muxlislar raqib o'yinchilarini izdan chiqarishga harakat qilishadi, ammo “Bunyodkor” liq to'la stadionlarda to'p tepaverib o'rganib qolgan, bu bilan jamoani ruhiy ezish mushkul.

Agar “Bunyodkor” 1:0 hisobida g'alaba qozonadigan bo'lsa, qo'shimcha bo'limlar belgilanadi, keyin navbat penaltilar seriyasiga borishi mumkin. Agar “Bunyodkor” Doxadagi qahramonlikni Ar Riyodda ham ko'rsata olsa, chorak finalga yo'l oladi. Yo'qsa yo'lni “Al Hilol”ga bo'shatib berishga to'g'ri keladi. Demak, Volkov shogirdlaridan qahramonlikni kutib qolamiz.

X.Xoliqov.