“Neftchi” – “Dinamo” o'yini oldidan kim qanday fikrda?
12 avg 2021 16:32
Yangiliklar
![](https://championat.asia/upload/storage/652383_original.jpg)
![](/upload/storage/652383_220.jpg)
“Neftchi” – “Dinamo” o'yini oldidan kim qanday fikrda?
Farg'onadagi “Istiqlol” stadionida “Neftchi” jamoasi Samarqandning “Dinamo” klubini qabul qiladi. Mazkur uchrashuv turning markaziy o'yini sanaladi. SHu bois muxlis va mutaxassislarning bo'lajak bahsga bo'lgan qiziqishi yuqori. Superligaga chiqish uchun astoydil kurashayotgan “Neftchi” va “Dinamo” jamoalari o'rtasida turnir jadvalida peshqadamlik qilish bo'yicha ham o'ziga yarasha intriga yuzaga kelgan. Xo'sh, bugun soat 20:00da boshlanadigan o'yin oldidan kim qanday fikrda?
Obid Jo'raboev: “Neftchi”ni qanday o'ynashini har tomonlama o'rganib chiqdik”
Oxirgi ikki mavsumdan buyon samarqandliklar sharafini himoya qilib kelayotgan tajribali Obid Jo'raboev bugungi kunda “Dinamo”ning sardori hisoblanadi. Mudofaa chizig'ida sheriklarini boshqarib turish bilan birga, ayrim uchrashuvlarda raqib darvozasi tomon yo'l topa olayotgan 35 yoshli futbolchi bugungi “Neftchi”ga qarshi kechadigan uchrashuv oldidan saytimizga o'z fikrlarini bildirib o'tdi.
- CHindan ham bugun Farg'onada qiziqarli va murosasiz uchrashuv kechishini oldindan tahmin qilish mumkin. “Dinamo” mazkur o'yinga har tomonlama puxta tayyorgarlik ko'rdi. Yigitlarning ruhiyati yomon emas. Hozir turnir jadvalida peshqadam bo'lib turibmiz. Nasib qilsa “Neftchi” bilan o'yinda egallab turgan o'rnimizni mustahkamlab olmoqchimiz. Farg'onada ochko olish uchun astoydil kurashamiz.
- “Neftchi” jamoasini o'tkazgan o'yinlarini ko'rib, tahlil qilib chiqdik albatta. Raqib tarkibida bo'ydor va shu bilan birga nomdor futbolchilar xarakat qiladi. Jamoa asosan havoda to'p uzatish orqali o'yin tashkil etadi. SHunga yarasha “Dinamo” jamoasi ham tayyorgarlik ko'rdi. Maydonda kim ko'proq yugursa va mexnat qilsa o'sha jamoa g'olib bo'ladi. Yuqorida aytib o'tganimdek, “Neftchi” tarkibida tajribali va nomdor o'yinchilar ko'proq. Bu ularning ustun tomoni bo'lishi mumkin. Bu bilan “Dinamo”da maxoratli o'yinchilar yo'q demoqchi emasman. Qolganini o'yinga chiqqanimizda ko'rasiz.
- O'yin boshlanish vaqtini 20:00ga belgilangani menimcha har qanday futbolchi uchun juda qulaydir. CHunki kechki salqinda yugurish birmuncha osonroq bo'ladi. “Istiqlol”stadionida barcha sharoitlar bor. Ayniqsa yoritish tizimi talabga javob beradi. Fursatdan foydalanib, o'yin tashkilotchilariga oldindan minnatdorchilik bildiraman.
Bekzod Tolibov: “Markaziy o'yin taqdirini bitta gol hal qilishi mumkin”
Saytimizning farg'onalik muxbiri Bekzod Tolibov mana bir necha yillardan buyon PRO-Liga o'yinlarini bevosita stadionning o'zidan kuzatib borish bilan birga, chempionat uchrashuvlarini keng tarzda yoritib borishga xarakat qilmoqda. “Neftchi” – “Dinamo” o'yini oldidan Tolibov o'z fikrlarini bildirar ekan, jamoalarning shu kungacha o'tkazgan o'zaro o'yinlar statistikasi va bir qancha qiziqarli malumotlarni ham keltirib o'tdi.
-"Neftchi" - "Dinamo" qarama-qarshiligi o'ziga xos tarixga ega. Bugunga qadar jamoalar jami 53 marta to'qnash kelishgan va undan 34 ta bahs farg'onaliklar foydasiga yakunlangan. Statistikaga etibor qaratsak ustunlik "Neftchi" tomonida.
-Jamoalarning bugungi uchrashuvi shubhasiz markaziy maqomga ega. Boisi ayni damda jadvalning birinchi va uchinchi pog'onasini egallab turgan bu ikki klub o'rtasidagi o'yin Pro-liganing 15-turidan so'ngi musobaqa peshqadamini aniqlab beradi. Ruhiyat bo'yicha ustunlik "Dinamo"da, chunki ular o'tgan turni G'uzorda "SHo'rtan" mehmoni bo'lib g'alaba bilan yakunlashdi. Farg'onaliklar ham o'z maydonlarida raqiblarini ayab o'tirganlari yo'q, deyarli har bir o'yin kamida yirik hisobda yakunlanayapti. Ilhom Mo'minjonov shogirdlarining ustunligi raqib darvozasiga ko'p gol kiritayotganliklarida hisoblanadi. "Dinamo"ning so'ngi o'yiniga etibor qaratsangiz, jamoa hisobni ushlash va imkon qadar gol o'tkazmaslik bo'yicha alohida uslub ustida ishlagandek. SHu sabab bugun "Neftchi" uchun gol urish oson bo'lmaydi.
-Bugungi o'yinda "Dinamo" shubhasiz ikkinchi raqamli jamoa sifatida o'ynaydi. Samarqandliklar himoyada mustahkam turgan xolda qarshi hujumda o'z imkoniyatlarini qidirishadi. "Neftchi" joriy mavsumda ko'proq hujumkor o'yin tarafdori ekanligi ko'rinib turibdi. SHu sabab bugun farg'onaliklar ko'proq hujum kutsa bo'ladi. Bu o'yinning taqdiri bitta golga bog'liq, yani "Dinamo" birinchi gol ursa qattiq yopiq himoya rejimiga o'tadi. Agar "Neftchi" birinchi bo'lib hisobni ochadigan bo'lsa unda samarqandliklar oldinga o'tishlari va shu orqali ochiq futbol ko'rishimiz mumkin. Bu tabiiy xolda farg'onaliklarga hujumda bo'sh xududlar taqdim etadi.
- Bugungi o'yinda "Neftchi"ning g'alabasini taxmin qilayapman.
Islombek Rustamov suhbatlashdi.
O’xshash yangiliklar
![AMP Logo](https://championat.asia/image/logo-amp.png)
Fikrlar