Muzaffar Muzaffarov: “Ortda qolayotgan yil men uchun omadli kechdi”

Iqtidorli futbolchi qisqa fursat ichida jizzaxliklarning etakchilaridan biriga aylanib ulgurdi. SHu bois Muzaffarovni 2015 yilning kashfiyotlaridan biri deyish mumkin. Yaqinda futbolchi bilan suhbatlashib, ortda qolayotgan yil va yangi yildagi rejalari haqida so'radik.

- Muzaffar, ortda qolayotgan 2015 yil siz uchun qanday o'tdi?
- Joriy yil men uchun juda ham omadli bo'ldi. Sababi oliy ligada deyarli debyut mavsumimni o'tkazdim va etarlicha o'yin amaliyotiga ega bo'ldim. Tabiiyki bu bilan futbolchi sifatida ham birmuncha o'sishga erishganimni his etdim. Buning uchun eng avvalo “So'g'diyona” bosh murabbiyi – Davron aka Fayzievga minnatdorchilik bildiraman. U kishi menga qo'rqmasdan ishonch bildirib, imkoniyat berdi. Bildirilgan ishonchni oqlash uchun astoydil xarakat qildim. Jizzaxga kelib o'zim uchun ajoyib tandemni topdim. Bu – Sanjar Rashidov. U bilan birga yonma-yon o'ynash hamisha men uchun qulay bo'ldi. Bir-birimizni so'zsiz tushunadigan darajaga chiqdik. Bu ham mening 2015 yildagi yutuqlarimdan biri bo'ldi. 

- Yangi yil bayramini bungacha qay tariqa o'tkazib kelgansiz? Va bu yil qanday nishonlamoqchisiz? Aytaylik, oila davrasidami yoki do'stlar bilanmi?
- Yangi yilni har safar oilam davrasida kutaman. 2016 yilni ham nasib qilsa shu tariqa qarshi olish niyatidaman.

- Yangi yilda Qorbobodan nima so'ragan bo'lardingiz?
- Qorbobodan emas-u, Yaratgandan yurtimizga tinchlik osoyishtalik, ota-onamga sog'liq salomatlik so'rayman.

- Siz uchun shu kungacha o'tgan yangi yil bayramlarida esda qolgan xotiralar qaysilar bo'lgan?
- Har safar yangi yil bayrami men uchun yaxshi o'tadi. Bu borada birortasini ajratib qo'rsata olmayman.

Islombek Rustambekov.