Muxtor Qurbonov: "Bu yil eng ko'p durangga biz erishayotgan bo'lsak kerak"

- Bugun uchrashuv og'ir o'tishini kutgandik. CHunki andijonliklar hozirgi paytda har bir o'yinda ochko uchun tushishyapti. Afsuski, o'yin biz kutgandek bo'lib chiqdi. Uchrashuv davomida to'pni o'zimizda nazorat qilgan bo'lsak-da, mehmonlar ham yomon harakat qilishgani yo'q. Ayrim vaziyatlarda ular qarshi hujumdan foydalanib gol urishlari ham mumkin edi. Afsuski, bugun bizga omad kulib boqmadi. Sababi Zafar Polvonovning zarbasidan keyin darvozaga kirib ketayotgan to'pga Igor Taran tegmaganda gol urardik. Nima ham qilardik, oldinga qarab yurishda davom etamiz. Har doim ham g'alaba qozonib bo'lmaydi. Menimcha, bu yil chempionat eng ko'p durangga biz erishayotgan bo'lsak kerak. Endi keyingi uchrashuvlarda g'alaba qozonishga harakat qilamiz.

- Taran ko'plab vaziyatlardan foydalana olmadi. Nega uni almashtirmadingiz?
- Bizning asosiy hujumkor o'yinchilarimiz boshlang'ich tarkibdan joy olishdi. Zaxira o'rindig'ida o'yinimizni kuchaytirishi mumkin bo'lgan birgina futbolchi G'ulom-Haydar G'ulomov bor edi xolos. Ammo u ham bir kun oldim betob bo'lib qoldi. SHu sababli tavakkal qilib uni maydonga tushirgim kelmadi. Igor Taranda tajriba baribir katta. Balki gol urar deb kutgandik. Lekin aksiga olib, hujumchi kirib ketayotgan to'pga halaqit qildi.