Mo'minjon Meliev: “Lokomotiv” safida ko'proq gol urmoqchiman”

Mazkur bahs borasida “temiryo'lchilar” hujumchisi Mo'minjon Meliev fikrlariga quloq tutdik.

“Qizilqum” bilan o'yin xususida

- Bilasiz, raqib jamoa tarkibida tajribali futbolchilar yig'ilgan. O'yindan olgan taassurotlarim katta. Biz mazkur bahsda juda muhim g'alabani qo'lga kiritdik. Ikkinchi davrani g'alaba bilan boshlash ajoyib kayfiyatni taqdim qiladi. Biroq bu o'yinni esdan chiqarib, keyingi o'yinlarga astoydil tayyorgarlik ko'ramiz.

G'alaba borasida

- Murabbiylarimiz tomonidan berilgan barcha ko'rsatmalarni bajardik. Qolaversa, g'alabaga bo'lgan ishtiyoqimiz yuqori edi. Biz bir jamoa bo'lib harakat qildik va yakunda maqsadimizga erishdik. 

Yangi jamoa nechta gol urishi xususida

- To'g'risi, o'zimda ham bu borada savollar bor. Xudo xohlasa, “Lokomotiv” safida ko'plab gollarni urmoqchiman, bunga astoydil harakat qilyapman. Muhitga moslashib ketishimga jamoadoshlarim ham yordam berishmoqda. Afsuski, vaziyatlardan foydalanishda ozgina omad etishmayapti. Biroq jamoaga yordam berish va gollarim bilan g'alaba keltirsam bundan faqat xursand bo'lardim. 

“Lokomotiv”ning maqsadi to'g'risida

- Bilasiz, jamoamiz o'z tarixiga ega. Buni hamma juda yaxshi biladi. Xudo xohlasa, chiroyli o'yinlarimiz va g'alabalarimiz bilan muxlislarimizni xursand qilmoqchimiz. Ikkinchi davrada yuqori o'rinlardan birini egallash uchun oxirigacha kurashamiz.