"Mamlakatimizda futbol rivojlanmoqda, balki keyingi mundialda ishtirok etishimiz mumkin". Qirg'iz Respublikasi bosh murabbiyi ishtirokidagi matbuot anjumani (to'liq)

Qirg'iziston Respublikasi ustozi Urmat Abdukaimov va himoyachi Valeriy Kichin Turkmanistonga qarshi uchrashuv oldidan fikrlari bilan o'rtoqlashdi. 

"Jamoamiz ishtirokida yaxshi o'yin kutmoqdaman. Bu uchrashuvlar shaxsan men yosh murabbiy va futbolchilar uchun ajoyib imkoniyat deya olaman. Har bir futbolchi masuliyatni to'liq his qilib turibdi. Vatanimiz sharafini munosib himoya qilgan holda ijobiy natijaga erishishga harakat qilamiz.

Aytishim mumkinki, bu mening faoliyatimdagi Turkmanistonga qarshi birinchi to'qnashuv bo'ladi. Bu o'yinga yaxshi tayyorgarlik ko'rdik, tomoshabop o'yin kutmoqdamiz. Bunday issiqda oddiy o'yin bo'lmaydi. O'ylaymanki, ertangi o'yin barchaga manzur keladi va natija biz tomonda bo'ladi".

- So'nggi yillarda Qirg'iz Respublikasida bir necha nafar xorijlik murabbiylar ishladi. Yosh mutaxassis sifatida bugungi terma jamoani shakllantirish qanday kechmoqda?

- Men terma jamoada 2 yilni o'tkazdim. Shtefan Tarkovichning yordamchisi sifatida terma jamoada faoliyatimni boshlagandim. Moslashishga hojat qolgani yo'q. Hamma futbolchilarni yaxshi bilaman. Taktik tayyorgarlikka kelsak, Turkmaniston bilan yaxshi va qiziqarli o'yin bo'ladi. Raqib murabbiyi zamonaviy qarashlarga ega, yaxshi mutaxassis. 

- Turnirning FIFA kunlaridan tashqarida bo'lib o'tishi rejalarga tasir qilmadimi?

- Albatta tasiri bor. Xorij jamoalaridagi ayrim futbolchilarimiz birinchi o'yinga etib kela olishmaydi. Boshqa tomondan bu qolgan futbolchilar uchun o'zini ko'rsatishga imkoniyat. 

- Valeriy siz O'zbekistonda o'ynagansiz. Sizga o'zbek xalqi nomidan ham o'zingiz, ham biz uchun munosib harakat qildingiz. Qirg'iziston saralashni juda zo'r o'tkazdi. Keyingi qadam nimadan iborat?

- Tilaklar uchun rahmat. Biz o'zimiz uchun o'ynadik, boshqa tomondan yordam. Albatta, yurtingiz tarixidagi muhim voqea bilan tabriklayman. Maqsadimiz oldinga qarab intilish. Sportchi oldiga yuqori maqsad qo'ymas ekan u professional hisoblanmaydi. Biz oldimizga doim g'alabani maqsad qilib qo'yamiz. O'rtoqlik yoki rasmiy ahamiyati yo'q.

- Qirg'izistonda futbol infratuzilma borasida yaxshi ishlar amalga oshirilmoqda. "Barselona" akademiyasi ishga tushdi, yangi stadion quriladi. Keyingi Jahon chempionatida sizlarni ko'rishimiz mumkinmi?

- Albatta birinchi o'rinda futbolimiz rahbarlarining say-harakatlari bilan bo'lmoqda. Bunday sharoitlarda oldimizga yanada yuqoriroq maqsadlar qo'yamiz. Dastlab Osiyo Kubogi keyin esa Jahon chempionati saralashiga harakat qilamiz. Infratuzilmalar faqat rivojlanishga hissa qo'shadi.

- Erjan Tokotaev "Andijon" safida yaxshi o'yin ko'rsatmoqda. U haqida nima deya olasiz? 

- Erjan uchun xursandmiz. Joel Kojo va Erjan shu erda yig'inimizga qo'shildi. Bu yaxshi bo'ldi. Terma jamoadagi o'yinlar orqali futbolchilar kuchli jamoalarga yo'l olishi osonlashadi. Deylik Valeriyni ham O'zbekistonda yaxshi tanishadi. O'zbekiston chempionati bizga qaraganda yuqoriroq darajada. 

- Raqiblarni qanchalik o'rgandingiz?

- Har bir raqibni sinchkovlik bilan o'rganamiz. Raqibimiz Turkmaniston yangi murabbiy bilan bitta o'yin o'tkazdi, tan olish kerak malumot ko'p emas. Turkmaniston futbolchilari OCHLda o'ynaydi, taniymiz. O'monni Karlush Keyrush kabi katta nom boshqarmoqda. Tabiiyki ular munosib tayyorgarlik ko'rishmoqda, boz ustiga Jahon chempionati saralash bosqichining navbatdagi raundida qatnashadi. Birinchi o'yinda nima yangi narsalar bo'lishini ko'rib olamiz. O'zbekiston bilan yangi o'yin o'tkazish yoqimli bo'ladi. 

- Qirg'izistonda yangi klublar ochilmoqda. Valeriy ham shunday jamoalardan birida o'ynaydi. Bu mamlakat chempionati o'sishiga turtki bo'ldimi?

- Ha, tasir qilyapti. Raqobat kuchaymoqda, kuchli legionerlar jalb qilinyapti. Yoshlar o'sishga erishmoqda. Aytishim mumkinki, chempionatimiz kuchaydi. Terma jamoalarga futbolchilarimiz chaqirilmoqda. Bu xursand qilmay qolmaydi. 

- Qirg'izistonda o'ynayotgan 3 nafar o'zbekistonlik futbolchini ajratib ko'rsata olasizmi?

- "OshMU" jamoasida Maradona Safarovni aytardim. Shaxsan men kim o'ynayotganini yokim kimga qarshi o'ynayotganimga ahamiyat bermayman. Ronaldu, Shomurodov, Maradona Safarov farqi yo'q. 

- Bir necha yil oldin Guljigi Alikulovni qirg'izistonlik Messi deyishgandi. Hozir ham shunday topilmalar bormi?

- Yaxshi yoshlar etishib chiqmoqda. Nomma nom aytish noto'g'ri bo'ladi. Olimpiya terma jamoamiz Bishkekda saralashda o'ynaydi. Kuchli raqiblar bilan o'yinlarda ularning imkoniyatlarini ko'rib olishimiz mumkin.