Juftakni rostlashning ayni payti

   2021 yilning 3 avgusti o'zbek futboli ishqibozlari uchun unutilmas, quvonchli kun bo'lgandi. O'shanda yurtdoshlarimiz, Eldor SHomurodovning Rimning «Roma»si bilan 5 yillik shartnoma imzolaganidan rosa xursand bo'lishgandi. 

Bugun esa 2023 yilning 24 yanvari, Evropada transfer oldi-sotdisi yakunlanishiga roppa-rosa 7 kun qoldi. 2 yil avval Eldorning «Jenoa»dan «Roma» safiga borib qo'shilishini qanchalik xohlagan bo'lsak, bugun futbolchimizni Rimni tark etishini shunchalik istayapmiz. Nima ham derdik, o'tgan vaqt ichida Eldor asosiy tarkib futbolchisiga aylana olmadi, Joze Mourinyu ishonch bildirmadi. Portugaliyalik mutaxassis hali beri Rimdan ketadiganga o'xshamaydi. Demak shunisi aniqki, SHomurodov jamoada qoladigan bo'lsa, buyog'iga ham zaxira o'rindig'i stullarini isitishda davom etadi. O'zi aslida Joze ham vatandoshimizning jamoada qolishiga qarshi bo'lmasa kerak, negaki SHomurodov hujumning istalgan nuqtasida harakat qila olish xususiyatiga ega va eng muhimi Eldor ichki muhitni buzuvchi futbolchilar sirasiga kirmaydi. Futbolchimizga hozirda Italiyaning «Torino», «Kremoneze», «Speciya», Franciyaning «Lill», Ispaniyaning «Valiyadolid» va Germaniyaning «Bayer» jamoalaridan qiziqish borligi aytilmoqda. Bilishimizcha bu jamoalarning ayrimlari rimliklarga rasmiy taklif bilan chiqishgan, ayrimlar esa shunchaki qiziqishning o'zigina bo'lishi mumkin. Eldorning o'zi OAVga bergan intervyularida «Roma»dan ketishga qarshi emasligini bildirgan. Hamma gap «Roma» rahbariyatida. Rim jamoasi Eldorga sarflangan pullarni maksimal darajada qaytarib olmoqchi. Bilasiz, klub futbolchi transferiga 18 million evro atrofida sarmoya jalb qilgan. Eldorni o'z jamoasida ko'rishni istovchilardan talab qilinayotgan summa 13, 14 million atrofida. Birgina «A» seriya autsayderi «Kremoneze»gina shuncha pulni berishga rozi ekanligi aytilmoqda, lekin futbolchi quyi ligaga tushib ketish ehtimoli yuqori bo'lgan jamoaga o'tmoqchi emas. Kelishuv amalga oshishi uchun 3 la tomonning fikri bir nuqtada birlashmog'i lozim.

SHomurodov «Roma»da qolsa nima bo'ladi?

Agarda Eldor rimliklar safida qoladigan bo'lsa, yuqorida aytkanimizdek zaxira o'rindig'i stullari isitilishda davom etiladi. Tabiyki vaqtini zaxirada o'takazadigan futbolchining transfer bahosi pastlaydi. O'yin amaliyotining yo'qligi, futbolchi sport formasiga jiddiy tasir o'tkazadi. Oqibatda taklif tushayotgan jamoalarning soni ham saviyasi ham kamayadi.

Juftakni rostlashning ayni payti.

Eldorning hozirda 28 yoshda ekanligini inobatga olsak, ketishning ayni payti. Futbolchi kuchli chempionatlarda o'zini ko'rsatishni istasa, tezroq otga qamchi urmog'i lozim. Hozirda darajasi kuchsizroq biror jamoaga o'tib, keyinchalik o'zini ko'rsatgan holda yana toplarning etiboriga tushsa bo'ladi. SHomurodovning potencialini yaxshi bilamiz. Hujumchi o'rtamiyona jamoalarning goleador hujumchisi vazifasini bemalol uddalay oladi (xuddi «Jenoa»dagidek).

Hammasi bir tomonga hal bo'lishiga yana 7 kun bor.

Jaloliddin Xalilov.