Sergey Lushchan: "Teng kuchli jamoalar kurashi guvohi bo'ldik"

- O'yin haqida fikringiz?

- Biz uchun juda qiyin bo'ldi. Aytarli hech nima o'xshamadi, ayniqsa hujumda. Bu nima bilan bog'liq, tahlil qilib ko'ramiz. Raqib ham ko'p vaziyatlar yaratdi deya olmayman. Teng kuchli jamoalar kurashi guvohi bo'ldik. Yakkakurashlar ko'p bo'ldi, balki yutmaganimizga maydon xalaqit bergandir, bir narsa deya olmayman. Shunga qaramay futbolchilarga rahmat aytdim.

- Ruslanbek Jiyanov zaxiraga olinishiga nima sabab bo'ldi?

- Chunki u biz kutgan o'yinni namoyish qilmadi. Jiyanov, Mirsaidov jamoamiz bilan asosiy yig'inda bo'lishmadi, ularning ikkisi deyarli mashg'ulot o'tkazmadi. Bir oy hech nima qilmasdan faqat dam olishdi. Xuddi shuningdek, boshqa futbolchilar ham mashg'ulotlarda to'liq ishtirok etmadi. Boltaboev bir oyni hujjatlarini tayyorlash bilan o'tkazdi. Xullas, hozirgi tarkibda mashg'ulotda qatnashmagan 7-8 futbolchi o'ynayapti. Shuning uchun zo'rg'a durang qayd etayotganimizdan ham xursandman. Jamoada nima bo'layotganini bilish uchun jamoaning ichida bo'lish kerak. Men jamoa ichida bo'lganim uchun hammasini bilaman.

- "Navbahor" ketma-ket uchta o'yindan beri g'alaba qozona olmayapti. Buning sababi nimada? 

- Bu jamoaning funkcional holati bilan bog'liq. Birinchi davra oxirlarida 10 nafarga yaqin yoshlarni majburan asosiy tarkibga o'tkazdik, chunki zaxiramizda hech kim qolmagandi. Mana hozir ko'ryapsiz, yoshlar o'zini ko'rsatishga harakat qilyapti. Biz reja bo'yicha ishlashda davom etyapmiz. Albatta, aqllilar ham bor, bizga nima qilish kerakligini o'rgatadigan. Lekin men ularga quloq solmayman.

- Bugungi muxlislik va performans sizga yoqdimi? 

- To'g'risi, o'yin payti diqqat etiborimni faqat maydonga va futbolchilar harakatiga qarataman. Bazan baqirishadi, ammo men etibor bermayman, bazan tushunmayman ham. Muxlislik har doim jamoaga nisbatan bir xil bo'lishi kerak. Yutganda qarsak chalib, yutqazganda so'kish fan-klubning ishi  emas. Bu muxlislik madaniyatiga umuman to'g'ri kelmaydi.

- Yangi kelgan o'yinchilar haqida nima deya olasiz?

- Ularning jamoamizga kelganiga endi 10 kun bo'ldi. Ozroq vaqt kerak, keyin ular ham o'zlarini ko'rsatadi. Bu yil bizga oson bo'lmayapti, boshidagi 7ta turni juda qiynalib o'tkazdik. Men yangi kelganlarga to'liq ishonaman.

- Ketganlarni ushlab qolsa bo'larmidi? 

- Ijaraga ketganlar bo'ldi va ularni o'zimiz qo'yib yubordik. Kimgadir 200 baravar ko'p maosh taklif qilishdi va u ketdi. Bu normal holat. Yaxshi taklif bo'lsa futbolchi ketadi.

- 25 avgust kuni yana "So'g'diyona"ga qarshi bahs olib borasiz.

- Futbolchilar o'zgarmaydi, 20 nafar o'yinchi qaydnomadan joy oladi. Lekin qanaqa o'yin ko'rsatishimizni vaqt ko'rsatadi.