"Jeparovni Superligada o'ynashiga ruxsat bermaslik qonunan inson huquqlarini poymol qilish bilan barobar" - SHipilov

Kechagi Superliganing yangi mavsumi qura marosimi yakunlangach "Metallurg" bosh murabbiyi Andrey SHipilovning mazkur jarayon va kutilmagan o'zgarish haqidagi fikrlari bilan qiziqqanimizdan so'ng, jamoaning yangi transferiga aylangan Server Jeparovning mavsum oldidan topshirgan normativ testlardan o'tolmagani haqida so'radik. Andrey SHipilov mazkur masala bo'yicha quyidagi fikrlarni bildirdi:

"Bilasizmi, agarda futbolchi tez yugurib qandaydir normativ testni topshira olmasligi hech nimani anglatmaydi. Bu hech qanday ko'rsatkich emas.

Yaxshisi, barcha uning o'yinlarini tomosha qilsin! Jeparovga Superligada o'ynashga ruxsat berishadimi? Biz shunga umid qilamiz. Uning Superligaga o'ynashiga ruxsat bermaslik qonunan inson huquqlarini poymol qilish bilan barobar! Huquqiy jihatdan hech kim Jeparovga futbol o'ynashni taqiqlashga haqqi yo'q!

Biz hozirga qadar 9 nazorat uchrashuvini o'tkazdik. SHu bahslarda Jeparov o'rtacha har bir o'yinda 11-13 km masofani bosib o'tmoqda. Masalan, oxirgi "Bunyodkor"ga qarshi bellashuvda Jeparov 11 km masofani bosib o'tdi. Futbolchi futbol o'ynashi kerak, quruq yugurishdan nima naf?", - deya gapirib o'tdi Andrey SHipilov.