Javohir Qahramonov: "Lokomotiv"dan o'tgan turdagi mag'lubiyatdan so'ng boshqacha o'yin kutgan edik"

O'tgan turda poytaxt jamoasi "Paxtakor" ustidan zafar quchgan Ulug'bek Baqoev shogirdlari, Coca Cola Superliga 5-turida Toshkentda "Lokomotiv" maydonidan 2:1 hisobidagi g'alaba bilan qaytdi. Bahsdan so'ng "Sug'diyona"ning iqtidorli futbolchisi Javohir Qahramonovning fikrlari bilan qiziqdik.

"Bizga uch ochko kerak edi. "Paxtakor"ni yutganimizdan so'ng o'z kuchimizga bo'lgan ishonch ancha ortdi. To'g'risi, "Lokomotiv"dan avvalgi turda uchragan mag'lubiyatidan so'ng kuchliroq va boshqacha o'yin kutgandik. Odatda qolgan jamoalar ham bunday yirik hisobdagi mag'lubiyatdan so'ng tayyorgarlikka katta kuch tashaydi. Bugun jamoamizning tajribali futbolchisi Jasur Hasanov standart vaziyatla mahoratini ko'rsatdi. Unda tajriba kattaligi shunaqa o'yinlarda bilinadi. To'g'ri, mavsumni yaxshi boshlamadik. Lekin, vaqt o'tgan sari mashg'ulotlarda bir-birimizni tushunishimiz normal holatga keldi. Karantin paytida o'zimiz uyda mashg'ulotlarni to'xtatmadik va qattiq mehnat qildik. SHuningdek ishtiyoq ham bugun bizda ko'proq edi. "Lokomotiv"ga keyingi o'yinlarda omad tilab qolaman",- deydi Javohir Qahramonov.