Ekspert fikri. Kamoliddin Murzoev: "Navbahor"ning natijasi ayanchli, lekin kimnidir erga urish yoki ko'tarish noo'rin"

Xususan, Olmaliqda OKMK "Bunyodkor"ga 5 ta gol urgan bo'lsa, xuddi shunday ko'rsatkichni "Buxoro" "Navbahor" bilan o'yinda qayd etdi. Markaziy o'yinda "Neftchi" o'z maydonida "Dinamo"dan ustun keldi. Ushbu bahslar yuzasidan sobiq futbolchi va O'zbekiston futbolchilar uyushmasi rahbari Kamoliddin Murzoev fikrlari bilan bo'lishdi. 

"Albatta, bu turda OKMK - "Bunyodkor" uchrashuvida kutilmagan natija bo'ldi. Bu erda "Bunyodkor"ning o'z darajasida o'ynamaganligi asosiy faktor hisoblanadi. Shu bilan birgalikda 5 ta to'p kiritish o'zi emas, bu Olmaliq jamoasining mahorati bilan bog'liq. Bunday o'yinlar chempionat davomida bo'lib turadi, shu bois qandaydir fojia yaratish kerak emas. Shunchaki bazi bir jamoalar bu tipdagi o'yinlarga tushib qolishadi. 

"Buxoro" bundan oldin O'zbekiston Kubogida "Bunyodkor"ni musobaqadan chiqarib yuborgandi. Bu jamoaning o'ziga hos potenciali borligidan dalolat deb o'ylayman. "Navbahor"ning bunday kutilmagan natijasi ayanchli holat. Bunday natijalarda bir jamoani erga urish yoki ko'tarish noo'rin hisoblanadi. Menimcha, "Buxoro"ga bu o'yinga yangi murabbiy olib chiqqani o'zgacha shijoat berdi. Ko'pincha bunday o'zgarishlar juda yaxshi yoki yomon natija olib keladi. "Buxoro"da bu ijobiy bo'ldi. 

"Neftchi"ning o'yini haqida gapiradigan bo'lsak, juda yaxshi o'yin guvohiga aylandik. Ikki jamoa ham oldiga yuqori maqsad qo'ygani ko'rinib turdi. "Neftchi" o'z uyida o'ynagani va oxirgi daqiqagacha kurash olib borganini aytish mumkin. Umumiy olganda bunday o'yinlar chempionatimizni bezatib beradi. Bizga shunday uchrashuvlar kerak, chunki mavsum yakuniga etib borgani sari jamoalarning jismoniy holati biroz pasaya boshlaydi. Shunday sharoitda yaxshi o'yinlar kerak deb o'ylayman",- deydi Kamoliddin Murzoev.