Hamidjon Aktamov: “Bunday muxlislar qarshisida “Barselona” bilan o'ynasak ham hujumkor o'yin namoyish qilsang arziydi”

- Bugun faqat g'alaba uchun maydonga tushgandik, - deya so'z boshladi Hamidjon G'ulomovich. - “Paxtakor” - mamlakatimizning amaldagi chempioni, bejizga Osiyo chempionlar ligasida qatnashmayapti. SHunga qaramay, bugun raqibga ochiq futbol taklif etdik. Juda ko'plab golli vaziyatlar sodir etilgan bo'lsa-da, yigitlarimiz imkoniyatlardan foydalana olishmadi. Oxirgi daqiqalarga qadar jonini berib o'ynagan yigitlarimizga katta rahmat!

Avval ham aytgandim, biz muxlislarni o'zimizning g'alabalarimiz bilan xursand qilishni maqsad qilganmiz. SHu uchun dastlabki daqiqalardanoq ikki hujumchini maydonga tushirdik. “Paxtakor” kuchli raqib, ammo himoyaga yotib olib ularga qarshi o'yinda ijobiy natijaga erishib bo'lmaydi. Bugun yigirma mingga yaqin tomoshabin o'yinni stadionning o'zidan kuzatdi. Bunday muxlislar qarshisida “Barselona” bilan o'ynasak ham hujumkor o'yin namoyish qilsang arziydi. Fursatdan foydalanib, bizni qo'llab-quvvatlayotgan ishqibozlarimizga rahmat aytaman.

Keyingi o'yin Qo'qonda bo'ladi. Maqsadimiz o'zgarmaydi. Ertadan navbatdagi uchrashuvga tayyorgarlikni boshlaymiz. “Qo'qon-1912” jamoasi bilan “Hokim kubogi”da kuch sinashganmiz. Tajribali mutaxassis va mahoratli futbolchilarga ega jamoa sanaladi. SHunga qaramay, vodiyga o'z muxlislarimizni xursand qilish uchun boramiz, albatta, - deydi Aktamov.

“Qizilqum” PFK Matbuot xizmati.