Farhod Safarov: "Biz ayni paytda natija ko'rsatishimiz kerak"

O'yindan so'ng tashkillashtirilgan matbuot anjumanida "Obod" jamoasi direktori Farhod Safarov ishtirok etdi.

"O'yin biz uchun qiyin o'tdi, sababi anchadan buyon g'alaba nimaligini bilmay kelayotgan edik. Uchrashuv boshidayoq Timur Hakimov to'p kiritgani yigitlarga qo'shimcha ishonch bag'ishladi. Futbolchilar tanaffusda berilgan ko'rsatmalarni alo darajada bajarishdi. Bugungi o'yindan qoniqdik", - deya so'z boshladi F.Safarov.

- Nima uchun bugun zaxira o'rindig'ida Jafar Irismetov yo'q edi?
- Jafar Irismetov o'yindan 2 soat oldin ham bazada biz bilan birga edi. Afsuski, sog'lig'i biroz yomonlashgani bois unga javob berdik. Nasib qilsa, keyingi o'yinlarda u zaxira o'rindig'ida bo'ladi va o'yinchilarimizga o'zi bevosita ko'rsatmalar berib turadi. Bugungi o'yinga ham jamoani Irismetov tayyorlagan.

"Hozir jamoa biroz qiyin holatda, sababi oxirgi o'rin bizni qoniqtirmaydi. SHuning uchun ham ko'proq hujumga etibor berishga va gol urishga intilayapmiz. CHiroyli o'yin emas, natija tarixda qoladi deyishadi. Biz ayni paytda natija ko'rsatishimiz kerak, bunga majburmiz," - deya so'zini yakunladi Farhod Safarov.