Farhod Nishonov: "Biz 9 ochkoni mo'ljallagandik"

- Bugun o'z o'yinimizni ko'rsata olmadik, bunga "Lokomotiv"ning bosimi sabab bo'ldi. Baribir "Lokomotiv" - katta klub, tarkibida nomdor, tajribali futbolchilar bor. Ushbu futbolchilarning bosimi tasir qildi deb o'ylayman. SHu sababli o'yin chiqmadi. Durang biz uchun yaxshi natija desam ham bo'ladi. Ular bizdan har tomonlama yaxshi o'yin namoyish qilishdi.

- Bugun ikkala jamoa tarkibida chetlatishlar bo'ldi. Bu haqida qanday fikrdasiz?

- Ikkala holatda ham hakam to'g'ri qaror chiqardi deb o'ylayman. O'z jamoamni aytadigan bo'lsam, futbolchim yo'q joydan qizil kartochka oldi. Bu keyinchalik asosiy musobaqalarda pand berishi mumkin. Bu bilan shuhullanamiz, barchasini tushuntiramiz. Keraksiz vaziyatda u jamoani qiyin holatga tushirib qo'ydi. Balki qizil kartochka bo'lmaganda, yutib ketishimiz mumkin edi.

- Jamoa oldiga kubokda qandaydir vazifa qo'yilganmi?

- Jamoamizda kubokda ham, umuman barcha o'yinlarda g'alaba uchun o'ynash vazifasi bor. Biz g'alabalar orqali Superligaga yo'llanma olmoqchimiz va kubokda ham uzoqroqqa bormoqchimiz.

- "Olimpik Mobiuz" Superligadagi "Olimpik"ning farm-klubimi?

- Yo'q, biz alohida jamoamiz. Lekin biz 2028 yilgi Olimpiadaga tayyorgarlik ko'rayapmiz. Albatta, "Olimpik"ning ham bizga aloqasi bor. Ular bu bosqichga tayyorgarlik borayotgan bo'lsa, biz keyingisiga. 2028 yilga kelib, ushbu futbolchilar 22, 23 yoshga kirgan bo'lishadi. "Olimpik Mobiuz" va "Olimpik" loyihasi bitta. 

- O'tgan tur jamoa "Qizilqum" bilan o'ynadi, bugun esa "Lokomotiv". Bular Superliganing nomdor jamoalaridan. Ulardan 4 ochko olindi. Bu haqida fikringiz.

- Biz 9 ochkoni mo'ljallagandik, biroq 4 ochko ham yomon emas. Lekin hali keyingi bosqichga chiqqanimiz yo'q. Barcha jamoalarda imkoniyatlar etarlicha. Keyingi o'yinda g'alaba qozonishimiz kerak.