Diyor Mirzaboev 9:0 haqida: “O'yinga qadar futbolchilarda tushkunlik holati mavjud edi”

- Muxlislarni quvontiradigan darajadagi o'yin bo'ldi. Yirik hisobda g'alaba qozongan bo'lsak-da, yigitlarni o'yinga tayyorlash oson kechgani yo'q. CHunki kuchli beshlikka kira olmaganimizdan keyin, futbolchilarda tushkun holat bor edi. “Aral Samali”ni hurmat qilgan holda aytamanki, ular shuncha gol urishimizga imkoniyat berdi. Jamoamiz oxirgi uchta o'yinda imkoniyatlaridan foydalana olmagandi. Bugun esa vaziyatlarni golga aylantira oldik. 

“Turon” bilan o'yinda himoyada Bekzod Tolibjonov va Doston Berdiqulov tandemini sinab ko'rgandik. Lekin Berdiqulovning jismoniy holati yaxshi emasligini bois, uni almashtirgandik. Bugun yana boshqa himoyachilarga imkoniyat berishni istagandik va Tolibjonov va Hojimatovni asosiy tarkibda maydonga tushirdik. SHohruh Xolmatovda esa ruhiy tomonlama muammolar sababli uni zaxirada qoldirib, ikkinchi bo'limda maydonga tushirdik. 

Albatta, kuchli beshlikka kira olmadik. “Xorazm” bilan bellashuvda g'alaba qozonganimizda, vazifani bajarishimiz mumkin edi. Ming afsuski, u erda mag'lubiyatga uchradik. Jamoa kuchli 5talikga kira olmadi. Hayot davom etadi. Biz endilikda mavsumni oltinchi o'rinda tugatish uchun kurashamiz. 12 sentyabr kuni keyingi bosqichga qura tashlanadi. Navbatdagi rejani amalga oshirish uchun harakat qilishda davom etamiz.