Davron Fayziev: "Hozirgi vaziyatimizdan chiqib ketishimiz uchun kamida 3 ta g'alaba zarur"

O'yin haqida

- Bu kabi asabiy o'yinlardan so'ng hozir biron fikr bildirish qiyin. Gol urmasang, yutmaysan, bu futbolning aniq qoidasi. Oxirgi turlar biz uchun qiyin o'tayapti. Darvozabonni aldab o'tib ham to'p kirmasligi, buni bilmadim. Yigitlar harakat qilishdi, astoydil o'ynashdi. "Lokomotiv", biz va "Surxon" jadvalning quyi qismida turibmiz. Bugungi o'yinda 3 ochko suv va havodek zarur edi. Lekin yana murosa yo'lini tanladik. SHuncha ko'p vaziyatni ko'kka sovurish har qanday jamoani tushkunlikka tushirib qo'yadi. So'ngi uchrashuvlarda 15-20 ta golli vaziyatlarni yaratyapmiz. 

- Ketma-ket g'alabasiz seriyalarni bir so'z bilan qanday izoxlagan bo'lardingiz?

- Qanday ifodalash mumkin? Hozirgi savolizga javob bersam bahonadek ko'rinishi mumkin. Javob bermasam bu ham noto'g'ri. Murabbiyning peshonasiga yozilgani bo'ladi. Futbolchilarni aybdor qilishga haqqim yo'q, ular harakat qilishayapti. Ikkinchi davrada 6 ta durang, 2 ta mag'lubiyat qayd etdik. Hozirgi vaziyatimizdan chiqib ketish uchun kamida 3 ta g'alaba zarur. Ishlashda davom etamiz.

Rahbariyat qandaydir qaror beradigan bo'lsa, bunga tayyorman. Murabbiylikning qismatida hamma narsa bor. Vaziyat yarata olmagan bo'lsak, murabbiy aybni to'liq bo'yniga olishi mumkin. Rahbariyat murabbiyning ishini ko'rib chiqib tahlil qiladi.