Bugun futbol. "Qo'qon-1912" - "Navbahor"

Bugun Qo'qon shahrida juda qiziqarli bahs kechishi kutilmoqda. Bunga sabab, bugun muxlislar vodiy derbisiga guvoh bo'lishadi. Turnir jadvalida juda qiziq vaziyat yuzaga kelgan. Ikkala jamoa ham yonma-yon o'rinlarda bormoqda. "Qo'qon-1912" 37 ochko bilan 6-o'rinni egallab turgan bo'lsa, "Navbahor" undan bir ochko kam jamg'argan holda 7-o'rinda bormoqda. 

Bilasizmi? "Qo'qon-1912" hozircha ikkkinchi davrada uch marta g'alaba erishgan va uchalasi ham uydagi o'yinlarda qo'lga kiritilgan. Jamoa o'z maydonida "Obod", "Neftchi" va "SHo'rtan"dan ustun kelgan. Bundan tashqari, qo'qonliklar uydagi bahslarda bir marta yutqazib qo'yishgan. 

"Navbahor"ga keladigan bo'lsak, bu jamoa ikkinchi davrada ancha kuchaydi. Xususan jamoa ikkinchi davraning dastlabki to'rtta uchrashuvidan uchtasida g'olib chiqdi. "Navbahor" o'z maydonida "Paxtakor"ni yutib ancha shov-shuv ko'targandi, biroq keyingi turda "Lokomotiv"ga imkoniyatni boy bergach, shov-shuv tezda unutildi. 

Bugun "Navbahor" safarda jiddiy jamoaga qarshi bahs olib boradi. Ilhom Mo'minjonov shogirdlari hozircha ikkinchi davrada safar o'yinlarida faqat bir marta g'alaba qozonishdi. Toshkentda "Obod" mag'lub etilganidan beri "Navbahor" safarda "Neftchi" va "SHo'rtan" bilan durang o'ynagan bo'lsa, "Mashal" va "Lokomotiv"ga imkoniyatni boy berdi. 

Fakt: "Navbahor" mavsum boshidan beri safarda faqat ikki bor zafar quchgan. Jamoa "Dinamo" va "Obod" klublarini mag'lub etib qaytgan.