Bugun futbol. "Andijon" - "Qizilqum"

Oliy liga. 24-tur. 1 oktyabr
ANDIJON - QIZILQUM
Boshlanish vaqti 16:00

Turnir jadvalidagi o'rni: "Andijon" 16-o'rinda (23 ochko), "Qizilqum" 7-o'rinda (37 ochko).
Ochkolar orasidagi farq - 14 ochko .

Tarif: Oliy liga jadvalida oxirgi o'rinni egallab turgan "Andijon" elitada qolish imkoniyatlarini saqlab qolish uchun "Qizilqum"ni mag'lub etishga urinib ko'radi. "Andijon" jamoasi o'z maydonida "Nasaf" bilan durang o'ynab, safarda "Mashal"ga yirik hisobda yutqazib qo'ydi. Bugun "Qizilqum" ham bo'sh kelmasa kerak, negaki navoiyliklar oxirgi to'rtta o'yindan beri g'alaba qozona olishmadi. SHu bois Andijonda qiziqarli bahs kechishi kutilmoqda.

Fakt: "Andijon" ikkinchi davrada faqat ikki bor g'alaba qozondi. Jamoa oxirgi to'rtta o'yinning uchtasida mag'lub bo'ldi va bir marta durang o'ynadi. Umuman olganda, andijonliklar uyda o'tkazilgan 11ta uchrashuvdan to'rttasida g'alaba qozonib, bir bor durang o'ynashgan va olti marta mag'lub bo'lishgan. To'plar nisbati 10-16.

Fakt: "Qizilqum" ikkinchi davrani qatorasiga to'rt g'alaba bilan boshladi va keyingi to'rtta o'yinda zafar qucha olmadi. Jamoa ikki bor durang o'ynagan bo'lsa, yana ikki marta yutqazib qo'ydi. Mavsum boshidan beri "Qizilqum" safardagi 11ta uchrashuvda 14 ochko jamg'argan. To'rtta g'alaba, ikki durang va besh mag'lubiyat. To'plar nisbati 11-14.

Eslatma: Navoiyda kechgan birinchi davra uchrashuvida maydon egalari 2:1 hisobida zafar quchishgan.