Bugun "CA" 5 yoshga to'ldi, tadbir esa bo'ladi...

SHu boisdan aynan ushbu sanani o'zimiz uchun tug'ilgan kun sifatida nishonlashni odat qildik.

2014 yilgi tug'ilgan kunimiz ko'pchilikning yodida qolgan edi. Kamoliddin Kenjaevga bag'ishlangan kechamizda 50 mln so'mdan ziyod pul yig'ilgandi. 2013 yil esa Osiyo chempionatida g'alaba qozongan O'zbekiston o'smirlar terma jamoasi va oliy ligamiz yulduzlari saytimizning qadrdon o'quvchilariga qarshi bahs olib borishgan edi. 2012 yil ham yomon bo'lmagan. O'zbekiston milliy terma jamoasi azolari saytimiz "yuzer"lariga qarshi maydonga chiqqan edilar.

Avvalo, bugungi kundagi saviyaga chiqishda saytimizning barcha fidoiy xodimlariga katta rahmat aytaman! Aynan ahil va inoq jamoa tufayli bugungi yutuqlarga erishyapmiz deb o'ylayman. Futbol bu shunchaki oddiy o'yin va uni deb dilxiralik qilish kerak emasligini doimo takidlab kelganmiz. Bundan keyin ham shunday bo'ladi.

Bu safar hech qanday tadbir yo'qmi, deysizmi? Ochig'i, rejamizda yo'q edi. Lekin kuni kecha "Feysbuk" ijtimoiy tarmog'ida Olimjon Ergashev tomonidan qilingan murojaat yilni tadbir bilan yakunlashga undadi. Gap shundaki, Olimjon akaning farzandi Hasanjon operaciya qilinishga muhtoj. SHuning uchun navbatdagi akciyamiz Hasanjon Ergashevga bag'ishlanadi. Bu haqida birozdan keyin to'liq axborotga ega bo'lasiz.