Bir yil avval Reyes halokatga uchragandi
01 iyu 2020 18:59
Yangiliklar

Bir yil avval Reyes halokatga uchragandi

O'tgan yilning ayni kunida taniqli ispaniyalik futbolchi Xose Antonio Reyes hayotdan ko'z yumgan va "Championat.asia"da u haqida maqola elon qilingandi. Xorij nashrlari marhum futbolchini eslayotgan bir paytda biz ham sizning etiboringizni o'sha maqolaga qaratamiz.

Xose Antonio Reyes 1983 yil 1 sentyabrda Sevilya provinciyasi tarkibidagi Utrera munisipalitetida tavallud topdi.

Futbolchi sifatida ushbu shaharchadan tashqarida 24 yil faoliyat olib bordi.

11 yoshida «Seviliya» jamoasi akademiyasiga qabul qilingan bolakay 1999 yil asosiy jamoa safiga qo'shildi. «Seviliya» 2001 yil Ispaniya ikkinchi divizioni hisoblangan Segundada g'alaba qozonib, La liga yo'llanmasini qo'lga kiritishida o'z hissasini qo'shdi.

Uning iqtidorini o'z vaqtida payqagan Arsen Venger uni o'z jamoasida ko'rishni xohlaydi. Transfer 2004 yilning qishida 17,5 million funt-sterling evaziga amalga oshirildi. Malumot uchun, o'sha yillarda Frenk Lempard 11 million funtga baholangandi. Birgina Reyesning transferiga sarflangan mablag'ga Jermeyn Defo, Maykl Karrik va Glen Jonsonni sotib olish mumkin edi. Xose Antonio «to'pchilar» safida 2006 yil yoziga qadar to'p tepdi. Bu muddatda mamlakat chempionligi va kubogini qo'lga kiritib, Evropa chempionlar ligasi finalchisiga aylandi.

«Real»da bir yil ijarada o'ynab, Ispaniya chempioniga aylangan Reyes 2007/2012 yillarda Madridning 2-raqamli jamoasi sharafini himoya qildi. «Matraschilar» safida ikki bor Evropa ligasida g'olib bo'ldi. 2008/09 yilgi mavsumni «Benfika» safida ijara evaziga o'tkazdi.

2012 yil 5 yanvarda «Seviliya»ga o'tdi. Sobiq jamoasiga qaytgan yarim himoyachi qatorasiga 3 marta Evropa ligasida zafar quchdi (2013/16 yillar) va ushbu musobada 5 marta g'olib chiqqan ilk futbolchiga aylandi. 2016/17 yilgi mavsumda «Espanol» sharafini himoya qilgan Reyes mavsum so'ngida futbolchilik faoliyatini yakunladi.

Ammo, 2018 yil yanvaridan boshlab quyi divizion jamoalarida o'ynay boshladi. Dastlab, 2018 yilning yoziga qadar «Kordova»da to'p surdi. Keyin joriy yilning boshiga qadar Xitoy chempionati 2-divizioni sharafini himoya qiladigan Urumchining «Sinczyan Tyanshan Leopard» jamoasida o'ynadi.

Ispaniyaga qaytib, «Estremadura» sharafini 9 bahsda himoya qilishga ulgurgan Xose Antonio Reyes 1 iyunda Utrerada avtomobil halokati natijasida vafot etdi.