Benzemaning kelmagani, O'tkir Yusupov va "Navbahor" safidagi yo'qotish - Samvel Babayan ishtirokidagi matbuot anjumani

"Navbahor" ustozi Samvel Babayanga yosh futbolchi SHodiyor SHodiboev hamrohlik qildi.

"Osiyo chempionlar ligasidagi har bir o'yin, ayniqsa pley-off bosqichiga chiqqanimiz, "Navbahor" klubi tarixi uchun yangi davr bo'laveradi. 2023 yilda viloyat rahbariyati, murabbiylar shtabi va futbolchilar katta mehnat qilishdi va OCHLda guruhdan chiqdik. Bir yil avval Osiyoning eng kuchli klublari va dunyo yulduzlari Namanganga kelishini orzu qilardik. Biz bunga erishdik. Ammo bu endi tarix. Ertaga biz butun O'zbekiston sharafini himoya qilamiz. Menimcha xalqimiz "Navbahor"ga muxlislik qiladi.

Raqibga keladigan bo'lsak, "Al Ittihod"ni tanishtirishga hojat bo'lmasa kerak. Katta tarixga ega klub, Osiyoda ko'plab yutuqlarga erishgan. "Al Ittihod" safida dunyo yulduzlari bor, ular Osiyo kubogidan keyin ikkita o'yin o'tkazishga ham ulgurishdi.

Biz esa yangi mavsumga tayyorgarlikni olib bordik. Afsuski tarkibimizdagi barcha futbolchilarni sinab ko'rish uchun na o'rtoqlik, na rasmiy o'yin o'tkazdik. Ertaga kuchli ijrochilarga qarshi juda tartibli o'yin, juda kuchli ishtiyoq va albatta muxlislar yordami zarur bo'ladi", - dedi Samvel Babayan.

"Ertaga juda qiziqarli va kuchli o'yin bo'ladi. "Al Ittihod" Osiyoning eng kuchli klublaridan biri. Mashg'ulotlarda juda yaxshi tayyorlandik. Ertaga xudo xohlasa g'alaba qozonamiz", - dedi SHodiyor SHodiboev.

- "Al Hilol"ga qarshi Namangandagi bahsda Neymar o'ynamagandi, ertaga Benzema o'ynamaydi. Bu siz uchun omadmi yoki ularni maydonga tushishini istarmidingiz?
- Ochig'ini aytsam, biz uchun bu katta tarix. Albatta Neymar ham, Benzema ham kelganida yaxshi bo'lardi. Saudiya Arabistonidagi bahsda Neymar maydonga tushganida durang o'ynagandik, Namanganda Neymar kelmaganida yutqazgandik. Benzema ham kelganida yaxshi bo'lardi, bu O'zbekistonda futbolning yanada ommalashuviga sababchi bo'lardi. Ammo Benzema kelmasa ham "Al Ittihod" kuchsizlanib qolmaydi. Oxirgi ikki o'yinda klub ajoyib o'ynadi.

- Osiyo kubogidagi Qatarga qarshi bahsda O'tkir Yusupov ishonchsiz o'ynadi. Uning ruhiy holati qanday?
- Ishonchsiz o'yin deganingizga qo'shilmayman. Agar u o'tkazgan golini aytayotgan bo'lsangiz, o'sha vaziyatda rekoshet bo'lgandi. O'tkir to'g'ri poziciyani tanlagandi, shunchaki rekoshetdan keyin to'pga reakciya qila olmadi. Qatarga qarshi bahsda Yusupov ikkita penalti qaytardi, bu esa O'tkir top futbolchi ekanini, ham milliy terma jamoa, ham "Navbahor" klubi etakchisiligini anglatadi. O'sha o'yin uning ruhiy holatiga hech qanday tasir qilgani yo'q, unga ishonishda davom etamiz.

- O'zbekistonda hali mavsum boshlanmadi. Saudiya Arabistonida esa mavsum davom etmoqda. Bu ertangi o'yinga qanchalik tasir qiladi deb o'ylaysiz?
- Yuqorida aytganimdek raqib mavsum o'rtasida. Biz esa mayli rasmiy o'yinni qo'ya turalik, barcha futbolchilar ixtiyorimizga kelishganidan keyin hatto o'rtoqlik uchrashuvini ham o'tkaza olmadik. Ammo bu bahona emas. Ertaga mavsumdagi eng yaxshi o'yinlarimizdan birini o'tkazishga harakat qilamiz. Osiyo chempionlar ligasidagi har bir o'yin yangi tarix. Yigitlar harakat qilishadi.

- "Navbahor" muxlislariga Osiyo chempionlar ligasini sovg'a qilganingiz uchun rahmat aytaman. "Al Ittihod" safida ertaga hujumchilar Benzema, Jota va Koronado bo'lmaydi. Bundan kelib chiqsak, ertaga "Navbahor"dan hujumkor o'yin kutsak bo'ladimi? Muxlislar daldasi ham muhim rol o'ynaydi.
- Siz "Al Ittihod" safida o'ynamaydigan futbolchilarni sanab o'tdingiz, ammo ularsiz ham ikkita o'yin o'tkazdi va ikkita yirik g'alabaga erisha olganini bilasiza? SHu bois qaysidir yulduz futbolchilarning yo'qligi sezilmasa kerak. Jamoa tarkibida kuchli futbolchilar juda ko'p. Ertangi bahsda qanday strategiyada o'ynashimizni ertaga kechki payt aytib beraman.

- Ibrohim Yo'ldoshevning holati qanday?
- Afsuski yo'qotishlar bor. Ammo ularning o'rnini bilintirmaslikka harakat qilamiz. Ertaga Ibrohim Yo'ldoshev maydonga tusha olmaydi.

Eslatib o'tamiz, "Navbahor" - "Al Ittihod" uchrashuvi 15 fevral kuni soat 19:00da boshlanadi.

Navbahor Namangan

AFC Champions League Final Stage . 1/8-tur 15/02/2024, 18:00 0 : 0 Tugadi

Al Ittihad

45'

90'

11'  Odildzhon Khamrobekov

31'  Samvel Babyan

78'  Jamshid Iskandarov (Siavash Haghnazari)

78'  Toma Tabatadze (Giorgi Nikabadze)

79'  Giorgi Nikabadze

86'  Ruslanbek Jiyanov (Doston Abdulkhaev)

53'  Fawaz Al Sagour

57'  Marwan Al Sahafi (Ahmed Alghamdi)

74'  Romarinho (Saleh Al Jamaan)

Match-senterda ochish