Baxtiyor Ashurmatov: "Rahbariyatning daldasi ham yigitlarga qo'shimcha kuch bag'ishladi"

Baxtiyor Ashurmatov (“Navbahor” jamoasi bosh murabbiyi): - Bugun o'yindan oldin yigitlarga uchrashuvda oson bo'lmasligini takidlab o'tgandim. Barchaga malumki, “So'g'diyona” jamoasi dastlabki uchta tur yakuniga ko'ra ochko jamg'ara olmagandi. O'z navbatida jamoamiz ham kerakli ochkolarni qo'lga kirita olmagandik. Aynan shu sababli, muxlislarimizga, qolaversa jamoamiz uchun uch ochko juda muhim edi. Umuman olganda o'yin og'ir bo'ldi. SHunga qaramay, qiyin bo'lsada g'alabani qo'lga kiritdik.

O'z navbatida “So'g'diyona” jamoasiga jangovor o'yin uchun minnatdorchilik bildirib o'tardim. Bugun ajoyib va jangovor o'yin bo'ldi. To'g'ri darvozalar oldida xavfli vaziyatlar kam yaratildi. Lekin, 90 daqiqa davomida maydonda keskin kurash kechdi. Oldingi uchrashuvlarda ijobiy natijalarni qayd eta olmaganimiz o'yingohdagi muxlislar sonini kamayishiga sabab bo'ldi. Ishqibozlarimizni mehrini qozonish va ularni o'yingohga qaytarish uchun kelgusi turlarda munosib o'yin ko'rsatishimiz talab etiladi.

Uchrashuvdan oldin viloyat rahbarlari jamoa echinish xonasiga kirib, futbolchilarga dalda bo'lishdi va bizni qo'llab-quvvatlashdi. Fursatdan foydalanib, jamoamiz azolari nomidan viloyat hokimiga rahmat aytib o'tgan bo'lardim. Rahbariyatni daldasi ham yigitlarga qo'shimcha kuch bag'ishladi. Bugungi g'alabani jamoamizni qo'llab-quvvatlagan muxlislarimizga bag'ishlaymiz. Ularga qo'llab-quvvatlab turganliklari uchun minnatdorchilik bildiraman. Qiyin bo'lsada muxlislarimiz yordamida chempionatdagi dastlabki g'alabamizni qo'lga kiritdik.

Keyingi uchrashuvlarda ishqibozlar kutgan o'yinlarni namoyish qilib, kerakli ochkolarni qo'lga kiritamiz degan umiddaman. Yigitlar hozirgi ko'rsatayotgan o'yinlaridan ham mazmunliroq to'p sura olishlariga ishonchim komil. Garchi chempionat endi boshlangan bo'lsada, o'yinimiz musobaqa jadvalida egallab turgan o'rnimizga mos emas. Futbolchilarimiz kelgusida o'z o'yinlarini topib olishadi va shunga mos ravishda musobaqa jadvalida ham yanada yuqoriroqqa ko'tarilishga erishamiz deb o'ylayman.

Melenchuk uchrashuvdan bir necha kun oldin shamollab qolgani uchun mashg'ulotlarda to'liq kuch bilan qatnasha olmagandi. SHu sababli, darvoza chizig'ida Xurshid Xo'jaevga imkon bergandik. Nazarimda Xo'jaev o'z imkoniyatidan samarali foydalandi. Agarda Xo'jaevni uchrashuv so'nggida yo'l qo'ygan xatosini inobatga olmaganda yaxshi o'yin ko'rsatdi. SHu sababdan keyingi uchrashuvda darvozani kimga ishonib topshirish borasida o'ylab ko'ramiz. Negaki, har ikki posbonimizning imkoniyati bir xil bo'lib turibdi.