Aleksandr Lobanov: "Paxtakor" mehmonda ham "Traktorsozi" bilan kamida durang o'ynashi kerak"

"Paxtakor" uchun bahs juda qiyin kechdi. Tashqaridan bu o'yinni kuzatish undanda murakkab. "Paxtakor" uchun juda ham xursandman. Muhim va kerakli g'alaba qo'lga kiritildi. O'ylaymanki, "sherlar" safardan ham kamida bir ochko bilan qaytishlari kerak. Menimcha, hali hech narsa boy berilgani yo'q. Guruhdan chiqish vazifasini uddalasa bo'ladi. "Paxtakor" har qanday vaziyatda ham "Paxtakor"ligicha qoladi. Bu jamoa oxiriga qadar kurashadi. Keyingi bosqich yo'llanmasi uchun kurash ham so'nggi turgacha davom etsa kerak. O'zbekistonning har to'rttala jamoasi chin yurakdan omad tilayman. O'ylashimcha, barcha jamoalarimiz guruhdan chiqish vazifasini uddalay olishadi. Jamoalarimiz o'yinida o'sish kuzatilgan, tarkib jihatdan ham ular ancha kuchayib olishdi. Bu mavsumda jamoalarimiz ishonchni oqlashadi degan umiddaman. Terma jamoa ixtiyoriga etib keldim va shu bois hozir Toshkentdaman. Biz qolgan ikkita o'yinni ham g'alaba bilan yakunlashimiz lozim. O'tgan vaqt oralig'ida juda katta ko'lamdagi ishlarni amalga oshirdik. Raqib kim bo'lishidan qatiy nazar vazifa va maqsad o'zgarmaydi. Doimo g'alaba. SHu bois bo'lajak o'yinlarda muxlislarni g'alabalarimiz bilan quvontirishga harakat qilamiz. Ular esa bizni qo'llab-quvvatlashlariga muhtojmiz. Filippin va Bahraynga qarshi bellashuvlarga barcha ishqibozlarni stadionda kutamiz", - dedi Aleksandr Lobanov.