– Ўйин ҳақида фикрларингиз қандай?
– Ўйин ҳақида гапирадиган бўлсак, "Насаф" кучли жамоа эди, шунга яраша тайёргарлик кўргандик. авваламбор, бугун стадионга келган мухлисларнинг, бутун Қўқон халқининг олдида юзимиз ёруғ бўлиши учун жуда қаттиқ ҳаракат қилдик. Йигитлар майдонда борини бериб ўйнашди, бироқ якунда дуранг қайд этилди.
– Бугунги ўйиндаги ҳисоб майдондаги ҳолатга ва ўйинга мос бўлдими?
– Тўғрисини айтсам, майдонда тенг кураш кечди. Шунинг учун, мен ўйлайманки, ҳа, ҳисоб ўйинга тўла мос ва адолатли бўлди.
– Пенальти белгиланган вазият анча баҳс ва мунозараларга сабаб бўлди. Бунга қандай қарайсиз?
– Биз узоқроқда турганимиз учун ҳолатни аниқ кўролмадик, ҳакам эса вазиятга анча яқинроқ эди. Шунинг учун ҳам у ўйинчиларнинг эътирозларига қарамай, ўз қарорини ўзгартирмади – пенальти белгилади.
– Бугунги натижадан келиб чиқиб айтадиган бўлсак, жамоа бир очкони қўлга киритдими ёки икки очкони йўқотдими?
– Энди, ўз уйимизда, мухлисларимиз қаршисида ўйнаганимизни ҳисобга оладиган бўлсак – албатта, икки очкони йўқотдик. Биз фақат ғалабани мақсад қилган эдик. Лекин рақибнинг қандай даражада эканлигини ҳам унутмаслик керак. Бундай шаклланган, яхши ва кучли жамоа билан бўлган қийин ўйинда қўлга киритилган бир очко ҳам олтинга тенг ҳисобланади.
