Mazkur uchrashuvda termamizning qo'li baland keldi. O'yin nihoyasiga etgach, "Ordabasi"da muvaffaqiyatli to'p tepayotgan himoyachi Odilbek Abdumajidov bilan suhbatlashdik.
- O'yin haqida
- O'yin haqidagi taassurotlarim a'lo darajada. Oldin ham Tojikistonga qarshi o'ynaganmiz, yaxshi shakllangan jamoa. Osiyo Kubogi oldidan oxirgi o'rtoqlik uchrashuvimizni o'tkazdik.
Jamoamiz futbolchilari endi yig'ilishdi. Ushbu o'yin bir-birimizni yaxshi tushunib olishimiz uchun tashkil qilingandi. Maqsadimiz jiddiy, Alloh nasib qilsa, muxlislarni xursand qilishga harakat qilamiz.
- Oyog'ingiz lat eganday tuyuldi, jarohat olmadingizmi?
- Yo'q, hammasi joyida. Oyog'imni ozroq shikastlab oldim, xolos.
- "Ordabasi"dagi faoliyatingiz juda yaxshi kechyapti. Boshqa jamoalardan qiziqish bo'lmadimi?
- Allohga behisob shukr, "Ordabasi"dagi foliyatim yaxshi kechmoqda. U yerda ijara asosida o'ynayapman. Hali "Metallurg" bilan yana 2 yillik shartnomam bor. O'zimni ko'rsatib, kuchliroq klublarda o'ynamoqchiman. Bunga astoydil harakat qilaman.
Eslatib o'tamiz, O'zbekiston U-23 termasi Osiyo Kubogidagi ishtirokini 1 iyun kuni Turkmanistonga qarshi uchrashuv bilan boshlaydi. Mazkur o'yin "Paxtakor" stadionida bo'lib o'tadi va u 20:30 da boshlanishi rejalashtirilgan.
