Шота Арвеладзе: "Ажойиб камбэк қилдик ва хатто учинчи голни уришимиз мумкин эди"

- Яхши ўйин бўлди. Хавфли вазиятлар, голлар. Жамоалар турнир жадвалида қандай ҳолатда бўлишига қарамасдан доимо бир-бирига жиддий қаршилик кўрсатиб келади. "Бунёдкор"да Чемпионлар Лигаси учун имконият борлигини билардик. Биз эса, "Пахтакор"нинг номи, мухлислари учун ўйнашни мақсад қилгандик.

Учрашувни ёмон бошладик деб ўйламайман, лекин ўйин аввалида майдон марказини бериб қўйишимиз оқибатида иккита гол ўтказиб юбордик. Шундан кейин ўзимизга келдик. "Бунёдкор"га тўпни узоқ вақт бериб қўйиш яхши оқибатларга олиб келмаслигини тушуниб етдик. Чунки "Бунёдкор" яхши комбинацион ўйин намойиш қилади. Тўп уларда узоқ вақт қолиб кетса, қайтариб олиш мушкул. Бунинг учун прессингни амалга ошириб, тўпни олиб қўйиш керак. Бизда бу ўхшади. Ажойиб камбэк намойиш қилдик ва хатто учинчи голни ҳам уришимиз мумкин эди. Аммо футбол шуниси билан қизиқ, ҳар доим ҳам кутганинг бўлмайди. Учинчи голни урамиз деб ҳужумга ўтганимизда ўз дарвозамиздан тўп олиб чиқдик. Нима ҳам дердим? "Бунёдкор"ни ғалаба билан табриклайман! Ҳа бизнинг мағлубиятсиз сериямиз якунига етди, аммо шонли клубга ютқаздик. Бундан ташқари терма жамоа устози бошчилик қилаётга клубга имкониятни бой бердик. "Бунёдкор"нинг бугунги ўйини мен учун "сюрприз" бўлгани йўқ. Рақибдан шундай шиддатли ва қанотлардан ҳужумкор ўйин кутгандим.

Бугун мавсумдаги 109-голимизни урдик. Албатта хатолар бўлади, улар устида ишлаймиз.

16-17 ёшли футболчини дарҳол майдонга тушириш тўғри бўлишини сизга ким айтганини билмайман. 20 кун давомида U-19 терма жамоаси Саудия Арабистонида бўлишди, ўсмирлар терма жамоаси ҳам йиғин ўтказди. Ёшлар доим биз билан бирга эмас, терма жамоаларда иштирок этиб қайтишади. Биз академия эмас клубмиз, бизда ўз академиямиз бор. Улар Тошкент шаҳар чемпионатида иштирок этишмоқда.