Зоҳид Абдуллаев - "Геннадий Красницкий клуби" аъзосига айланди
12 апр 2019 19:02
Янгиликлар

Зоҳид Абдуллаев - "Геннадий Красницкий клуби" аъзосига айланди

Суперлиганинг 4-туридан ўрин олган "Металлург" - "Қизилқум" учрашувининг биринчи бўлимида мезбонлар ҳужумчиси Зоҳид Абдуллаев дублга эришди.

Шу тариқа Зоҳид Абдуллаев кучлилар сафида киритган ўз голлари сонини 100тага етказди ва “Геннадий Красницкий” клубининг 31-аъзосига айланди.

Футболчи 100та голдан 68тасини миллий чемпионат ўйинларида урган, қолган голлар эса Ўзбекистон Кубоги баҳсларида рақиб дарвозасидан жой олган.

Зоҳид Абдуллаев Бекободнинг “Металлург” жамоасида 2010 йилги мавсумдан эътиборан тўп тепиб келади. Оралиқда икки мавсум (2013 йили “Насаф”, 2014 йили “Нефтчи”) бошқа жамоалар шарафини ҳимоя этди. Бекободдан ташқарида фаолият юритиш Абдуллаевга унчалик ёқмаган. Қаршида у голлари сонини 5 тага оширган бўлса, Фарғонадан умуман қуруқ қайтган.