Хорватия бош мураббийи: "Бразилияга қарши баҳсда устимиздан муздай сув қуйилгандай бўлганди"

"Аргентинага қарши жуда қийин ўйин бўлди, сабаби рақиб жамоа собиқ жаҳон чемпиони ва амалдаги вице-чемпион ҳисобланади. Афсуски, ўйин давомида иккита хатога йўл қўйдик ва бу бизга қиммага тушди. Учрашув давомида ҳужумларни якунлашда қийинчиликларга дуч келдик.

Мусобақа аввалида илк мақсадимиз плей-офф йўлланмасини қўлга киритиш эди ва буни уддаладик. Аммо кейинги режаларимиз амалга ошмади. Аргентина яхшироқ ўйин кўрсатди ва ғалабага лойиқ эди.

Ушбу мундиал давомида ҳам Бразилия, ҳам Аргентинага қарши ўйин ўтказдик. Бу ҳазилакам иш эмас. Улар чемпионлик учун уч давъвогарнинг иккитаси саналади. Бразилияга қарши баҳсда устимиздан муздай сув қуйилгандай бўлди (Хорватия ушбу ўйинда дарвозасидан 8 та гол ўтказиб юборди — таҳририят), аммо ўйиндан ўйинга мослашиб бордик ва Аргентинага қарши яхши ўйин ўтказдик. 

Мазкур жаҳон чемпионати ҳайратга бой бўлмоқда. Осиё жамоаларнинг савияси анча юқорилаганига, шунингдек, ҳар бир ўйин муросасиз ўтаётганига гувоҳ бўлдик. Шу билан бирга, Испания ва Португалиянинг мусобақани эрта тарк этгани ҳам ажаблантирди. Умуман олганда, ҳар бир жамоа савияси юқориламоқда ва ўйинлар юқори даражада ўтказилмоқда", деди Маврович.

Оқил Абдубарноев суҳбатлашди.