“Хоразм” жамоаси пойтахтда йиғин ўтказади

Айни дамда, урганчлик футболчилар бош мураббий Вали Султонов бошчилигида пойтахтга қараб йўлга чиқишган.
  
Жамоанинг сафари олдидан “Хоразм” футбол клуби директори Султонбой Нурметов билан учрашиб мухтасар суҳбатлашдик.

- Жамоанинг ушбу йиғинидан кўзланган мақсад нималардан иборат?
- 25 март санасига қадар давом этадиган машғулотларимиз қаторида 5-6 та назорат учрашувларини ўтказишни кўзлаяпмиз. Бундан ташқари футболчиларимиз махсус тиббий кўрикдан ўтишади. Қолаверса, Тошкентдаги йиғинимиз мобайнида жамоамизнинг якуний таркиби аниқлаб олинади.
    
-  Таркибда ўзгаришлар борми?
-  Жамоамизнинг ўтган йилги таркиби деярли сақлаб қолинди. Улар сафига вилоятимизнинг 2-лига ўйинларида тўп сурган қатор ёш футболчиларни жалб қилганмиз. Умуман, йиғинимиз чоғида майдондаги айрим чизиқларни кучайтириш мақсадида “Хоразм”га яна 3-4 та футболчини чақиришни режалаштирганмиз. Зеро, асосий мақсадимиз чиройли ўйинларимиз билан мухлисларимизни қувонтиришдир.

Икром  ХУДОЙБЕРГАНОВ,