"Терма жамоанинг янги асл қиёфасини бир ойдан кейин кўрасиз" — Купернинг Ўзбекистон терма жамоаси рулидаги энг сара иқтибослари

Биз Эктор Купер терма жамоамиз рулига ўтирганидан кейин шу кунга қадар матбуот анжуманларида айтган гапларидан баъзи иқтибосларни жамлаб, эътиборингизга ҳавола этишни лозим топдик.

Қайд этиш керакки, терма жамоамиз иштирокидаги ўйинларда ҳозирча яхши тарафга ўзгариш кузатилгани йўқ. Бу эса кўпчиликка Қатар-2022 саралаш босқичи олдидан ўринли саволларни туғдирмоқда.

Эктор Купер Ўзбекистон терма жамоаси рулига келганидан сўнг 1 ойдан кейин жамоанинг асл қиёфасини кўрсатишга ваъда берганди. Шунингдек, Осиё Кубогида ҳам Купер ғалаба қозониш вазифаси қўйилгани ва бу жиҳат шартномада алоҳида қайд этилганини ҳам таъкидлаганди. Қуйида Купер томонидан янграган иқтибослар коллекциясини ўқиб чиқишингиз мумкин.

Эктор Купернинг Ўзбекистон терма жамоаси мураббий сифатидаги илк матбуот анжумани (6 август, 2018 йил):

"Мени олдимга фақат иккита мақсад қўйилган: Осиё Кубоги ва Жаҳон чемпионати". ©️ Эктор Купер

Сурияга қарши ўйиндан олдинги матбуот анжуманида (5 сентябрь, 2018 йил)

"Бир ойдан кейин Ўзбекистон терма жамоасининг асл қиёфасини кўрасиз". ©️ Эктор Купер

Сурияга (1:1) қарши учрашувдан кейинги матбуот анжуманида (6 сентябрь, 2018 йил)

"Дастлабки ўйин сифатида қарасак, ўйин менга ёқди. Муаммолар кўп. Қилмоқчи бўлаётган янгилигим, ҳимоядаги ўйинни яхшилаш. Осиё Кубогига қадар вақт етарли. Унгача ўйинимизни кучайтирамиз. Мухлислардан сабр қилишларини сўрайман". ©️ Эктор Купер

Эронга қарши ўйиндан аввалги матбуот анжуманида (10 сентябрь, 2018 йил)

"Баъзилар ҳимояни севади, кимдир ҳужумни. Шахсан мен учун биринчи навбатда ҳимоя кучли бўлиши керак. Ҳаммаси аста-секинлик билан бўлади". ©️ Эктор Купер

Эронга (0:1) қарши ўйиндан кейинги матбуот анжуманида (11 сентябрь, 2018 йил)

"Ҳимоя ўтган ўйинга нисбатан яхшиланди, ҳужумда қиладиган ишларимиз кўп. Иккита ўйин хулосаси шуки, қаерда нималарга эътибор беришни аниқлаб олдим. Аввал ҳам айтганимдек, асосий урғуни ҳимояга қаратаман. Осиё Кубогига қадар вақт етарли. Ҳавотирга ўрин йўқ". ©️ Эктор Купер

КХДР билан ўйиндан олдинги матбуот анжумани (12 октябрь, 2018 йил)

"Осиё Кубогига қадар кўп синов ўтказамиз. Ҳужумкор услубни ваъда қилмайман. Менинг услубим натижа олиб келадиган ўйин кўрсатиш". ©️ Эктор Купер

КХДР (2:0) билан ўйиндан кейинги матбуот анжумани (13 октябрь, 2018 йил)

"Натижа ўз йўлига, ўйинимиз яхшиланганидан хурсандман. Ҳимояда тартиб пайдо бўлди". ©️ Эктор Купер

Иккинчи йиғин ҳақида (октябрь, 2018 йил)

"Дастлабки йиғинга нисбатан катта ўсишни кўрдим. Ҳаммаси тартибга боғлиқ". ©️ Эктор Купер

Интервью (октябрь, 2018 йил)

"Осиё Кубогидаги мақсад - чемпионлик". ©️ Эктор Купер

Ноябрь ойидаги йиғин доирасида матбуот анжумани ўтказилмаган. Мазкур йиғин доирасида Ўзбекистон терма жамоаси Австралияда Ливан (0:0) ҳамда Жанубий Корея (0:4) билан ўртоқлик учрашуви ўтказганди.

Декабрдаги матбуот анжумани (6 декабрь, 2018 йил)

"Осиё Кубогида чемпион бўлсаккина натижадан қониқаман". ©️ Эктор Купер

"Осиё Кубоги олдидан Туркиядаги йиғинда ўртоқлик учрашуви ўтказамиз". ©️ Эктор Купер

Ўзбекистон терма жамоаси Осиё Кубогига қатнашиш учун БААга учишдан аввал Туркиядаги йиғинда ўртоқлик ёки назорат беллашуви ҳам ўтказмади. Натижада қитъа чемпионатига бирорта ўртоқлик ўйини ўтказмай борган ягона жамоага айландик.

Осиё Кубоги. Уммонга қарши ўйин олдидан:

"Осиё Кубогини мухлисларга ёқадиган ўйин бошламоқчимиз". ©️ Эктор Купер

Осиё Кубоги. Уммонга (2:1) қарши ўйиндан кейин:

"Уммон мен кутгандан ҳам кучлироқ экан. Улардан бундай тезкор ва ҳужумкор ўйин кутмагандим". ©️ Эктор Купер

Осиё Кубоги. Туркманистонга қарши ўйин олдидан:

"Бизда муаммолар борлигини тушуниб турибмиз". ©️ Эктор Купер

Осиё Кубоги. Туркманистонга (4:0) қарши ўйиндан кейин:

"Мен жамоани доим ўз услубимга мослаб тайёрлайман. Мисол учун, шартномам бўйича яхши натижа қайд этиш учун жалб этилганман. Муҳими - натижа". ©️ Эктор Купер

Осиё Кубоги. Японияга қарши ўйин олдидан:

"Агар сен Осиё Кубогини қўлга киритмоқчи бўлсанг, унда ҳар қандай рақибни мағлуб этишинг керак". ©️ Эктор Купер

Осиё Кубоги. Япония (1:2) билан ўйиндан кейин:

"Мағлубиятдан хафа бўлишга ҳожат йўқ". ©️ Эктор Купер

Осиё Кубоги. Австралияга қарши ўйин олдидан:

"Ўзбекистон терма жамоаси ўзининг янги ўйин қиёфасини шакллантирмоқда. Мен 8та финални ютқазганман, лекин финалга чиқишни истайвераман...". ©️ Эктор Купер

Осиё Кубоги. Австралия (0:0, пенальтилар сериясида мағлубият) билан ўйиндан кейин:

"Биз кучли жамоа тузишга ҳаракат қиляпмиз. Афсуски, Осиё кубогида иштирокимизни якунлашга мажбур бўлдик. Бу Осиё Кубогида кучли терма жамоаларга қарши яхши ўйнадик". ©️ Эктор Купер

Осиё Кубогидан кейинги матбуот анжумани (14 март, 2019 йил)

"Осиё Кубогини юта олмадик, мен айбдорман. Эндиги мақсадимиз Жаҳон чемпионатига чиқиш". ©️ Эктор Купер

"Ҳеч ким менга терма жамоани ёшартириш керак деган талабни қўймаган. Келишувга кўра, менга Жаҳон чемпионатига чиқиш ва Осиё Кубогида чемпион бўлиш вазифаси қўйилган. Тўғри, Осиё Кубогини ютолмадик, бу менинг айбим. Эндиги мақсад Жаҳон чемпионатига чиқиш". ©️ Эктор Купер

Хитойдаги турнирдаги матбуот анжуманида (22 март, 2019 йил)

"Футболда турли натижа рўй беради. Ғалаба билан мағлубият доим ёнма-ён. Барча натижани қабул қилишга тайёр бўлиш зарур. Биз Уругвайга қарши учрашувни таҳлил қилиб, йўл қўйилган хато ва камчиликлар устида иш олиб борамиз". ©️ Эктор Купер

Туркияга (0:2) қарши ўйиндан кейин:

"Ўйинимизда ўзгариш бор, бундан мамнунман. Фақат стандарт вазиятларидан ўтказилаётган голлар ҳавотирга солмоқда. Туркияга қарши ёмон ўйнамадик". ©️ Эктор Купер

"Ўзбекистон терма жамоасида ўзгариш бор, лекин инқилоб йўқ" 

Купернинг номи ёки тажрибасига суянадиган пайт эмас 

Шунчаки маълумот: Эктор Купер биздан кучли ҳали бирорта термани ютмади 

Сўровномада иштирок этганларнинг катта қисми Купер савиясига шубҳа қилмоқда 

Орадан 120 кун ўтди, лекин ҳеч нарса ўзгаргани йўқ