Суперкубок қандай кўринишга эга?

Унда амалдаги чемпион ва Кубок соҳиби “Бунёдкор” билан олий лигада иккинчи ўринни эгаллаган “Локомотив” ўзаро кураш олиб боради.

Шу ўринда бизни иккита масала қизиқтирмоқда. Биринчиси, эртанги ўйинда ким ғолиб бўлиши, иккинчиси Суперкубокни ютган жамоага қандай кубок топширилиши.

Чиндан ҳам Суперкубокнинг кўриниши қандай экан? Бу ҳақда ПФЛ матбуот котиби Григорий Ртвеладзедан сўраганимизда кубок ПФЛ биносида эмаслигини ва эртага ўйин пайти стадионга олиб борилишини айтди.

“Локомотив” бош мураббийи Вадим Абрамовга ҳам шунга яқин савол билан мурожаат қилганимизда, мураббий ҳазил аралаш “Кубокни ҳали кўрмадим, кўришдан маъни ҳам йўқ” дея жавоб қайтарди.  

Хуллас, кубок ўзи қанақа ва қанчалик сифатли ишланганини эртага ўйин пайтида билиб оламиз.

Изоҳ: Қуйидаги суратда ПФЛ бош директори Фарҳод Магометов бу йилги ПФЛ Кубогини қўлида кўтариб турибди. Ўзбекистон Кубогининг қандай кўринишда эканлигини ҳам биламиз. Чемпионликни қўлга киритган жамоа кўпинча ўзига маъқул келган кубокни буюртма асосида ясаб оляпти.