"Шўртан" бош мураббийи Алексей Естафеев: "Биздаги муаммо руҳият билан боғлиқ"

Ўйин ҳақида

- Оғир ўйин бўлди. Бугун Биринчи лига жамоасига қарши ўйнадик. Биринчи бўлиб гол ўтказиб юборганимизга қарамай якунда ғалабани ўз томонимизга оғдира олдик. Лекин хатоларимиз бор, хатто кам эмас. Тўп узатишлар, футболчиларнинг ўзаро бир-бирларини тушунишда муаммолар кўзга ташланаяпти. Ҳали олдимизда бажариш лозим бўлган ишлар кўп.

- "Қўқон-1912"га қарши чемпионат ўйинида иккинчи бўлимдаги характер учун шогирдларингизга миннатдорчилик билдиргандингиз. Бугун ҳам худди шунга ўхшаш холат содир бўлди...

- Ҳа, тўғри "Қўқон-1912" ўйинда ҳам иккинчи бўлимдаги фаоллик эвазига очко олишни уддалагандик. Албатта, бугунги ўйин учун ҳам йигитларга раҳмат айтаман. Бироқ, айтиб ўтганимиздек, хато ва камчиликларимиз бор, ишлашимиз керак.

- Жамоанинг Про-лига ва Ўзбекистон кубоги мусобақаларида мақсади қандай?

- Биз ҳар бир ўйинда ғалаба учун майдонга чиқамиз, мақсадимиз шундай.

- Сизнингча, жамоадаги асосий муаммо нималардан иборат?

- Биздаги муаммо руҳият билан боғлиқ. Йигитларда ўзларига ишончни шакллантиришимиз керак. Ўйинлар мобайнида бу каби муаммолар бартараф этиб борилади.