Роналдунинг "Ювентус"га ўтишига беш сабаб

Келинг, биз Роналдунинг Италия клубига ўтиши ҳақидаги 5 та асосий сабабларни ўрганиб чиқамиз:

1. Роналду ҳозиргача кучли бешлик чемпионатларидан Англия ва Испания чемпионатларини забт этди, бу клублар сафида мамлакат чемпион бўлди, ЕЧЛни забт этди, энди унда яна бир кучли бешлик чемпионатларида ўйнаб кўриш истаги туғилган бўлиши мумкин.

2. "Реал Мадрид" клуби президенти Флорентино Перес футболчилар орқали қандай даромад қилишни билади, Роналдунинг ёши ўтиб бораяпти, натижалар чакки эмас пайтида сотиб юборишни кўзлаб, португалияликни "Ювентус"га ўтишига қаршилик қилмаётган бўлса керак.

3. Криштиану Роналду "Реал Мадрид" раҳбарияти билан шахсий шартнома бандлари бўйича келиша олмаётганлиги ҳақида кўплаб хабарлар урчиди, агар бу хабарлар рост бўлса Роналду қўйган талабларни айнан Турин клуби бажаришга рози бўлган ва португалиялик футбол юлдузининг клубдаги ойлик маоши учун юқори нарх белгилаган бўлиши мумкин.

4. "Реал Мадрид" клуби анчадан бери шов-шувли трансферни амалга оширмади. Жамоага Неймар, Мбаппе, Эден Азар каби футболчилардан бири келаётган бўлиши мумкин. "Реал Мадрид" клуби ёши ўтиб бораётган Роналдуни сотиш орқали фейр-плей қоидаларини мос равишда бажаришни кўзлаётган бўлиши мумкин.

5. Криштиану Роналдуни Италияда мухлислари кўп, буни ўзи яхши билади. Беш карра "Олтин тўп" соҳиби табиийки ўзининг майдондаги ҳаракатлари олқишланишини истайди. Эътибор берган бўлсангиз сўнги ЕЧЛ финалида Роналдунинг кайфияти доимгидек эмас эди. Чунки ўша учрашувда португалиялик гол ура олмади. Айнан ўша учрашувдан кейин унинг "Реал Мадрид"дан кетиши хақидаги хабарлар кескинроқ янграй бошлаганди.

Португалиялик футбол юлдузи, беш карра олтин тўп соҳиби Криштиану Роналдунинг "Ювентус"га кўчиб ўтиши ҳақидаги хабарлар ҳали расман тасдиғини топгани йўқ.  Роналду "Реал Мадрид"да қолиши ёки бутунлай бошқа жамоага ўтиши ҳам мумкин, унинг иқтидори ҳар қандай чемпионатда тўп суришга етади.

Бекзод Толибов