Ривалдо: “Хавига “Барселона”да осон бўлмайди, аммо...”

“Келажакда Хавининг “Барселона”га бош мураббий этиб тайинланишига шубҳам йўқ. У нафақат яхши инсон, балки ажойиб хислатларга эга мураббий ҳамдир. Маълум вақт ўтиб у “Барса”га мураббийлик қилиши лозимлигини тушуниб етади ва шогирдлари билан ўзи тўп тепган олтин авлод қайд этган натижаларни такрорлашга уринади. 

Бундай босим остида ишлаш унга осон бўлмайди. Чунки ундан ҳам Гвардиола сингари юксак натижаларни талаб қилишади. Хави ўзи майдонда ҳақиқий маэстро эди. Унинг қўли остидаги жамоа ҳам у тўп тепган услубда ҳаракатланиши аниқ. 

Албатта, ҳар қандай юксак натижани қайта такрорлаш осон иш эмас. Унга ўзи тузадиган тактик схемага мос келадиган футболчилар керак бўлади.

“Барселона”га устозлик қилишни ҳамма истайди. Юқори амбициялик жамоани бошқариш ҳар қандай инсонга масъулият юклайди.

“Барселона”га Хави мураббийлик қилаётган вақтда кўп нарса унинг қўли остидаги футболчиларнинг маҳоратига боғлиқ. Унга камида икки-уч нафар керакли футболчини жамоага жалб этиб, таркибни кучайтириши  ва жамоани Гвардиола жамоасидек даражага олиб чиқиши учун вақт бериш лозим бўлади.