Родри дисквалификация қилиниши мумкин

Ушбу қарор футболчининг "Тоттенхэм"га қарши 2:2 ҳисобидаги дурангдан кейин берган интервьюси билан боғлиқ.

1 февраль куни "Манчестер Сити" жароҳатлар билан муаммога дуч келган "Тоттенҳэм" меҳмони бўлди. Кўпчилик меҳмонлар учун бу учрашув осон ғалаба билан якунланади, деб ўйлаган эди.

Бироқ Пеп Гвардиола шогирдлари учун ўйин одатдагидек оғир кечди. Райан Черки ва Антуан Семеньонинг биринчи таймдаги голларидан кейин "Сити" олдинга чиқиб олди, аммо лондонликлар иккинчи таймда ҳисобни тенглаштиришга муваффақ бўлишди.

Учрашувдан сўнг Родри ҳакам Роберт Жонснинг бир эпизоддаги қарорига нисбатан кескин фикр билдирди ва бу катта баҳсларга сабаб бўлди.

Энг баҳсли вазият иккинчи таймда рўй берди. "Тоттенҳэм" ҳужумчиси Доминик Соланке ҳимоячилар Абдуқодир Ҳусанов ва Марк Геҳини хато қилишга мажбур қилди, натижада Геҳи ўз дарвозасига тўп киритиб қўйди.

Родрининг таъкидлашича, Соланке ҳимоячининг оёғи орқасидан тепиб, қоидабузарлик қилган ва гол ҳисобга олинмаслиги керак эди.

"Биз хафамиз, чунки қўполлик яққол кўриниб турган эди, у жамоадошим оёғига тепди", – деди Родри. "Бундай майда деталларга эътибор бермасак, ҳамма учун қийин бўлади, чунки бу лига майда жиҳатлар билан ҳал бўлади. Биламан, жуда кўп ғалабага эришяпмиз ва одамлар яна ғалаба қозонишимизни истамайди, аммо ҳакам бетараф бўлиши шарт. Бу адолатсизлик, чунки биз жуда қаттиқ меҳнат қиламиз. Барчаси тугаганда, одам ўзини хафа ҳис қилади".

Родрининг ҳакам "бетараф эмас" деган мазмундаги ишоралари катта салбий муносабатга сабаб бўлди. Шунинг ортидан ФА расмий баёнот тарқатди:

"Манчестер Сити" футболчиси Родри 2026 йил 1 февраль куни "Тоттенхэм"га қарши Премьер-лига учрашувидан кейин билдирган фикрлари учун интизомий айблов билан айбланди. Унинг флэш-интервьюда билдирган фикрлари ҳакам ёки ҳакамлар шаънига путур етказиш, уларнинг холислигига шубҳа қилиш сифатида баҳоланмоқда ва бу Англия футбол ассоциацияси қоидаларининг 3.1-бандига зид ҳисобланади. Родри 18 февраль, чоршанба кунига қадар ўз жавобини тақдим этиши керак".

Муддатдан кейин иш мустақил комиссия томонидан кўриб чиқилади ва энг эҳтимолий жазо – дисквалификация ҳисобланади.

Эслатиб ўтамиз, 2023 йил Англия футбол ассоциацияси "Ливерпуль"нинг ўша пайтдаги бош мураббийи Юрген Клоппни ҳакам Пол Тирни жамоасига қарши муносабатда бўляпти, деган гаплари учун майдон четида туриш ҳуқуқидан маҳрум қилган эди.